अकोल्यात ठाकरे गटाच्या उपशहरप्रमुखावर चाकू हल्ला; उपचारादरम्यान मृत घोषित

याबाबत मिळालेली माहिती अशी की, शहरातील जठारपेठ चौकातील गणेश स्वीट मार्टसमोरील एका मेडिकलवर विशाल कपले संध्याकाळच्या दरम्यान बसले होते. त्यावेळी आलेल्या दोन अज्ञात मारेकऱ्यांनी तोंड बांधून कपलेंवर पाठीमागून पाठीत हल्ला केला. हल्ला होताच ते उठून उभा राहिले, त्याचवेळी दुसऱ्या हल्लेखोरांने त्यांच्या छातीत वार करून गंभीर जखमी केले.

या घटनेची माहिती मिळताच पोलीस घटनास्थळी पोहोचले आणि स्थानिकांच्या मदतीने विशाल कपले यांना आयकॉन हॉस्पिटलमध्ये दाखल केले. पण अतिरक्तस्त्रावामुळे उपचारादरम्यान डॉक्टरांनी त्यांना मृत घोषित केलं.

पोलिसांनी दिलेल्या माहितीनुसार, विशाल कपले यांच्यावरील हल्ला जुन्या वादावरून झाल्याचे प्राथमिक दृष्ट्या निष्पन्न झाले आहे. अज्ञात हल्लेखोरांच्या विरोधात रामदास पेठ पोलिसांनी गुन्हा नोंदविला असून पोलिसांकडून हल्लेखोरांचा शोध सुरु आहे. सूत्रांनी दिलेल्या माहितीनुसार, एका संशयित हल्लेखोराला ताब्यात घेतल्याची प्राथमिक माहिती आहे.