मुंबईतील घटना! भाजप नेत्या सुलताना खान यांच्यावर धारदार शस्त्राने प्राणघातक हल्ला

मुंबईतील मीरा रोड परिसरात भररस्त्यावर भाजपच्या महिला नेत्यावर प्राणघातक हल्ला करण्यात आल्याची घटना समोर आलीये. भाजपच्या अल्पसंख्याक महिला प्रदेशाध्यक्ष सुलताना खान यांच्यावर रविवारी रात्री ११ वाजता अज्ञातांनी चाकू हल्ला केला. या घटनेत सुलताना खान या जखमी झाल्या आहेत.

भाजप नेत्या सुलताना खान या पतीसोबत डॉक्टरकडे निघाल्या होत्या. त्याचवेळी मोटारसायकलवर आलेल्या अज्ञातांनी त्यांची गाडी थांबवली आणि शिवीगाळ करत त्यांच्यावर हल्ला केला.

सुलताना खान यांच्यासोबत काय घडलं?

अज्ञातांच्या चाकू हल्ल्यात जखमी झालेल्या सुलताना खान यांच्या पतीने झालेल्या प्रकाराविषयी माहिती दिलीये. रविवारी (१७ जुलै) रात्री ११ वाजता ते सुलताना खान यांच्यासोबत डॉक्टरला भेटायला निघाले होते. त्याचवेळी मीरा रोड परिसरात दोन मोटारसायकलस्वारांनी त्यांच्या बाईक कारसमोर उभ्या केल्या.