याला म्हणतात माणुसकी.. वर्षभरापासून Covid Positive मृतदेहांवर अंत्यसंस्कार करणारे बहाद्दर

अकोला: मजहब नही सिखाता आपस मे बैर रखना… या ओळी आपल्याला बरंच काही शिकवून जातात. पण खरं तर आजच्या घडीला याच ओळींचा आज देशातील अनेकांना विसर पडलाय. पण असं असलं तरीही आजही काही उदाहरण अशी आहे की, ज्यांचं कौतुक करावं तेवढं थोडंच आहे. असंच एक उदाहरण हे अकोल्यातील कच्छी मेमन जमातीतील काही युवकाचं आहे.

माणुसकी म्हणजे काय असते हे गेल्या वर्षभरात या तरुणांनी दाखवून दिलं आहे. कोरोनाने महाराष्ट्रात मागील वर्षी शिरकाव केला. तेव्हापासून प्रत्येकाच्या मनात कोरोनाची लागण झालेल्या व्यक्तीपासून ते कोरोनाग्रस्ताच्या मृतदेहपर्यंत सगळ्याचविषयी भीती वाटते.

पॉझिटिव्ह रुग्णाचा मृत्यू झाला तर त्याचे नातेवाईक, कुटुंबीय देखील भीतीने त्याच्या जवळ जात नाहीत. त्यामुळे अशा मृतदेहांवर अंत्यसंस्कार कसे करायचे हा प्रशासनासमोर मोठा प्रश्न होता. पण याच प्रश्नाचं निराकरण अकोल्यातील 10 मुस्लिम युवकांनी केलं आहे.