गडचिरोली : आमदाराच्या सुरक्षा रक्षकाची गोळी झाडून आत्महत्या; पोलीस दलात खळबळ

आमदाराच्या निवासस्थानी नियुक्ती करण्यात आलेल्या पोलीस शिपायाने गोळी झाडून आत्महत्या केल्याची धक्कादायक घटना समोर आली आहे. गडचिरोली जिल्ह्यातील अहेरी येथे पोलीस शिपायाने राहत्या घरात गोळी झाडून आत्महत्या केली. रविवारी रात्री ही घटना घडली असून, प्रमोद शेकोकर असं मयत पोलीस शिपायाचं नाव आहे. या घटनेनं पोलीस दलात खळबळ उडाली आहे.

प्रमोद शेकोकर हे प्राणहिता पोलीस मुख्यालयात कार्यरत होते. काही दिवसांपूर्वीच त्यांची आमदार धर्मरावबाबा आत्राम यांच्या निवासस्थानी नियुक्ती करण्यात आली होती. त्यांची पत्नीही पोलीस दलात असून, ताडगाव पोलीस मदत केंद्रात कार्यरत आहे. रविवारी (२० फेब्रुवारी) रात्री त्यांनी अहेरी येथील पॉवर हाऊस कॉलनीमधील राहत्या घरी डोक्यात गोळी झाडून आत्महत्या केली.