Taliye ची दुर्घटना कशी घडली? सगळं गावच डोंगराखाली कसं गाडलं गेलं?

काय घडलं ?

22 जुलैला दुपारी 12 वाजता पहिल्यांदा डोंगराचा काही भाग खाली आला. डोंगर खचला म्हणून गावातले काही हौशी तरुण जमले आणि त्यांनी त्यासंदर्भातले व्हीडिओही मोबाईलमध्ये चित्रित केले. हा आपल्या मोबाईलमधला शेवटचा व्हीडिओ असेल याची त्यांना तेव्हा कल्पनाही नव्हती. या गावातले काही शेलार आणि सणस कुटुंबीय घाबरले आणि त्यांची कुटुंबं त्यांनी तळीयेच्या खालच्या गावात बारसवाडी पठार या गावात हलवली.

त्यांनी जाताना तळीये वरच्या वाडीतल्या लोकांना गाव सोडण्याची विनंती केली तेव्हाच वरच्या ग्रामस्थ म्हातारे-कोतारे वरच्या वाडीत जमले होते आणि अंदाज घेत होते. तेव्हा दुपारचे 4 वाजले होते आणि त्याचवेळी घात झाला वरच्या वाडी मागचा अक्खा डोंगर कोसळला तो कोसळला तोच या गावकऱ्यांवर आणि वरच्या वाडीवर.

ही घटना घडली म्हणजेच दरड कोसळली तेव्हा डोंगरात साठलेले पाणी खाली आले सोबत माती त्यामुळे भरपूर चिखल झाला. ग्रामस्थांना 3 ते 4 तास आधी दरड कोसळण्याचे संकेत मिळाले होते पण राहतं घर सोडणं सोपं नसता त्यामुळे ग्रामस्थांची जी उलघाल झाली त्यात वेळ गेला आणि ते तेवढ्यात काळाने डाव साधला.

एकूण सापडलेले मृतदेह – 55

गाडले गेलेले मृतदेह – 31

एकूण मृत्यू – 81

तळीये गावाची रचना

एकूण 4 वाड्या

वरची वाडी

मधली वाडी

खालची वाडी

सुतार वाडी

पूर्णपणे डोंगरात वसलेले गाव वरंधा घाटाच्या खालच्या अंगाला , गावकऱ्यांनी दिलेल्या माहितीनुसार गावात याआधी कधीही दरड कोसळलेली नाही

NDRF ने थांबवले मदतकार्य

दरडीच्या ढिगाऱ्याखाली दबलेले मृतदेह हे जेसीबीच्या साह्याने बाहेर काढले जात आहेत त्यात मृतदेहांची विटंबना होत आहे. स्वतःच्याच नातेवाईकांचे अवयव बाहेर येताना बघणं नको यामुळे गावकऱ्यांनी विनंती केली की शोध मोहीम थांबवा, त्यानंतर ही शोध मोहीम थांबवली गेली आहे. आता उरलेले 31 मृतदेह हे कधीच ढिगाऱ्याबाहेर येणार नाहीत.

मदत वेळेवर का पोहचू शकली नाही ?

वरंध बिरवाडी महाड रस्त्यावर ढालकाठी फाट्याजवळ पुराच्या पाण्याने आणि माती रस्त्यावर आल्याने रस्ता झाला बंद त्यामुळे गुरुवारी संध्याकाळी तळीये दुर्घटनेची माहिती महाड परिसरात पोहचून सुद्धा महाड वरून मदत येऊ शकली नाही. दुसरा रस्ता पुण्यावरून भोरमार्गे वरंधा घाटातून येतो तिथेपण माझेरी गावाजवळ दरड कोसळून रस्ता बंद झाला.

तिसरा रस्ता हा महाड मार्गे शिवथरघळच्या खालून येतो पण तिथे काळ नदीला आलेल्या तुफान पुरामुळे रस्त्या 7 ते 8 फूट पाण्याखाली होता त्यामुळे कुठनच मदत मिळू शकली नाही. तळीये गावाला पोचणारे तिन्ही रस्ते बंद झाल्याने मदत पोचायला शुक्रवारची दुपार उजाडावी लागली. दरड दुर्घटनेतून फक्त 5 लोक वाचले त्यांना मुंबई मधल्या जेजे हॉस्पिटलमध्ये दाखल करण्यात आलं आहे.

दरडीखाली अख्खं गावच गडप झालं. त्यामुळे गाव शोकसागरात बुडालं आहे. अनेक कुटुंबांवर दुःखाचा डोंगर कोसळला असून, गावकऱ्यांचं सांत्वन करण्यासाठी मुख्यमंत्री उद्धव ठाकरे गावात आले होते. मुख्यमंत्री उद्धव ठाकरे यांनी 24 जुलैला या गावाचा दौरा केला होता. पडलेली घरं, चिखल, दगडमातीचा ढिग, दरड कोसळल्याचा खुणा असं अस्वस्थ करणारं चित्र या ठिकाणी पाहून त्यांचंही मन हेलावलं. आता ही घटना नेमकी कशी घडली ते समोर आलं आहे.