भाजपच्या बंडखोर नगरसेवकांचा राष्ट्रवादीसोबत घरोबा; नगरपंचायतीवर फडकवला झेंडा

माळशिरस नगरपंचायतीच्या नगराध्यक्षपदाच्या निवडणुकीच्या निमित्ताने नव्या आघाडी उद्याला आली. देशमुख यांच्या नावाला भाजपच्या काही नगरसेवकांनी विरोध केल्यानंतर भाजपच्या बंडखोर उमेदवारांनी राष्ट्रवादीसह अपक्ष नगरसेवकांच्या मदतीने सत्ता स्थापन केली. भाजपच्या बंडखोरांनी राष्ट्रवादीसोबत घरोबा करत खेळलेल्या राजकीय चालीची माळशिरससह जिल्ह्यात चर्चा होत आहे.

माळशिरस नगरपंचायतीत भाजपा आणि राष्ट्रवादी काँग्रेस एकत्र आल्याचं चित्र पाहायला मिळालं. झालं असं की, माळशिरस नगरपंचायतीवर भाजपचा झेंडा फडकला. एकूण 17 जागांपैकी 10 जागांवर भाजपचे उमेदवार निवडून आले होते. तर उर्वरित राष्ट्रवादीचे 2, अपक्ष 3 आणि स्थानिक मविआचे 2 असे उमेदवार विजयी झाले होते. त्यामुळे १० (भाजप), २ (राष्ट्रवादी), ३ (अपक्ष), ३ (मविआ) असं बलाबल होतं.

दरम्यान, नगराध्यक्षपदासाठी मोहिते-पाटील समर्थक असलेल्या आप्पासाहेब देशमुख यांचं नाव निश्चित झालं होतं. मात्र, भाजपमधीलच काही सदस्यांचा त्यांच्या नावाला विरोध होता. त्यामुळे देशमुख यांनी त्यांच्या पत्नी आणि भावालाही निवडूकीत उतवरलं आणि जिंकूनही आणलं. त्याचबरोबर राष्ट्रवादीच्या तिकीटावर त्यांची बहीण निवडून आली आहे.

कुटुंबातीलच चार लोक आणि इतर अपक्ष असलेल्या 5 उमेदवारांना सोबत घेऊन सत्ता स्थापनेचं गणित जुळल्यानंतर स्वःपक्षातील पक्षातील सात नगरसेवकांना विरोधी बाकावर बसवत देशमुख नगराध्यक्षपदी विराजमान झाले.

उपनगराध्यक्षपदी राष्ट्रवादी काँग्रेसचे शिवाजीराव देशमुख यांची निवड करण्यात आली आहे. त्यामुळे माळशिरस नगरपंचायतीत राष्ट्रवादी काँग्रेसच्या मदतीने भाजपने गुलाल खेळल्याचं वेगळं समीकरण निमित्ताने पहायला मिळालं आहे. यावर बोलताना भाजपचे नेते धैर्यशील मोहिते-पाटील यांनी म्हटलं आहे की, ‘ही घटना नगरसेवकांच्या गैरसमजातून झाली आहे. याचा राष्ट्रवादी काँग्रेसला फायदा होऊ देणार नाही.’

साडेतीन वर्षं भाजपचा नगराध्यक्ष आणि दीड वर्ष अपक्ष नगराध्यक्ष. तसेच दीड वर्ष उपनराध्यक्षपद राष्ट्रवादीकडे असेल, तर उर्वरित कालावधीत उपनगराध्यपद भाजपकडे असेल. त्याचबरोबर सर्व समित्या भाजपकडे, असा या नव्या आघाडीचा फॉर्म्युला असणार आहे.

माळशिरस नगरपंचायतीतील पक्षीय बलाबल

भाजपा – १०

राष्ट्रवादी – २

इतर व अपक्ष – ५