नाशिकमध्ये मुस्लीम धर्मगुरूची गोळ्या घालून हत्या, Youtubeवरती 2 लाख फॉलोअर्स

नाशिक: महाराष्ट्रातील नाशिक जिल्ह्यातील (Nashik District) येवला येथे एका मुस्लिम साधूची अज्ञात व्यक्तींनी गोळ्या झाडून हत्या केली आहे. पोलिसांनी मृताची ओळख पटवली आहे. मृत मुस्लिम साधू हे मुळचे अफगाणिस्तानचे होते. नाशिक जिल्ह्यातील येवला तालुक्यातील चिंचोडी एमआयडीसीजवळील मोकळ्या जागेत मंगळवारी एका ३५ वर्षीय मुस्लिम आध्यात्मिक साधूची चार अज्ञातांनी गोळ्या झाडून हत्या केली आहे.

हत्येचे कारण समजू शकले नसल्याचे पोलिसांनी सांगितले. पोलिसांनी दिलेल्या माहितीनुसार, ख्वाजा सय्यद चिश्ती असे मृताचे नाव असून ते येवला येथे सुफी बाबा म्हणून ओळखले जात होते. या सुफी साधूंचे वय अंदाजे 36 वर्षे आहे, घटनास्थळी प्लॉटवर नारळ जाळण्यात आला असून, अगरबत्ती देखील सापडली आहे. पोलिसांनी दिलेल्या माहितीनुसार, हल्लेखोर सुफी बाबाची हत्या करून पळून गेले आहेत.

माहिती मिळताच नाशिकच्या येवला शहर पोलिस ठाण्याचे पोलिस निरीक्षक भगवान माथुरे व इतर पोलिस घटनास्थळी पोहोचले. मुस्लिम धर्मगुरूला जखमी अवस्थेत शासकीय उपजिल्हा रुग्णालयात नेले असता डॉक्टरांनी त्यांना मृत घोषित केले. सुफी संत ख्वाजा सय्यद चिस्ती सोशल मीडियावर खूप सक्रिय होते.