ग्रामीण पुण्यात ओमिक्रॉनचा शिरकाव; जुन्नरमध्ये 7 जणांना संसर्ग

पुणे: जिल्ह्यातील जुन्नर तालुक्यातील वारूळवाडी व नारायणगाव येथील एकूण ७ जणांना ओमिक्रॉनची बाधा झाल्याचे उघड झाल्याने तालुक्यात खळबळ उडाली आहे. येथील 16 रहिवासी दुबई येथे पर्यटनासाठी गेले होते. तेथून ते परत आल्यानंतर सर्व लोकांचे आरटी पीसीआर (rt-pcr) नमुने घेण्यात आले. सदर नमुने 12 डिसेंबरला पुणे येथील प्रयोगशाळेमध्ये पाठवण्यात आले होते.

या सर्व पर्यटकांपैकी एकूण 7 व्यक्तींच्या नमुन्यांचे अहवाल आज प्राप्त झाले. त्यांना ओमिक्रॉनची लागण झाल्याचं निदान झालं आहे.

सर्व रुग्णांना ग्रामीण रुग्णालय नारायणगाव येथे दाखल करण्यात आले आहे. यासोबत त्यांच्या संपर्कात आलेल्या सर्व लोकांचे RT-PCR नमुने प्राथमिक आरोग्य केंद्र वारुळवाडी येथे घेण्यात आलेले आहे व पुढील तपासणीसाठी पुणे येथे पाठविले आहे अशी माहिती वारूळवाडी प्राथमिक आरोग्य केंद्राच्या वैधकीय अधिकारी डॉ. वर्षा गुंजाळ यांनी दिली आहे.

कोरोना विषाणूच्या ओमिक्रॉन प्रकाराने संपूर्ण जगाची चिंता वाढवली आहे. कोरोना विषाणूचा ओमायक्रोन हा आतापर्यंत सर्वाधिक भयंकर प्रकार असून त्याचा प्रसार वेगाने होऊ शकतो अशी चिंता तज्ञांनी व्यक्त केली आहे. अशातच पुणे जिल्ह्यातील जुन्नर तालुक्यात ओमिक्रॉनचे सात रुग्ण आढळून आल्याने चिंता वाढली आहे.

याबाबत मिळालेल्या माहितीनुसार या रुग्णांचे कोरोना अहवाल पॉझिटिव्ह आले होते. जिनोम सिक्वेन्सीग चाचणीत त्यांना ओमायक्रोन ची बाधा झाल्याचे समोर आले आहे.

प्राथमिक माहितीनुसार या रुग्णांना कोणती लक्षणे जाणवत नाहीयेत. वारूळवाडी उपकेंद्राच्या माध्यमातून १६ जणांचे नमुने तपासणीसाठी पाठवण्यात आले होते. त्यापैकी सात जणांना ओमिक्रॉनची बाधा झाल्याचे समोर आले आहे. या सातही रुग्णांना नारायणगाव ग्रामीण रुग्णालय येथे विलगीकरण करण्यात आल्याची माहिती आहे.

आज केंद्रीय आरोग्य मंत्रालय तर्फे देण्यात आलेल्या माहितीनुसार देशात ओमिक्रॉन बाधितांची संख्या 101 वर पोहचली आहे.सर्वाधिक रुग्ण महाराष्ट्रात असून एकूण 11 राज्यात ओमिक्रॉनचे रुग्ण आढळून आले आहेत.