Rajeshwar Singh: ED च्या अधिकाऱ्याने नोकरीचा दिला राजीनामा, 24 तासात BJP कडून मिळालं आमदारकीचं तिकिट

आता त्यांचे भाजपमध्ये जाणे आणि त्यांना तात्काळ तिकिट मिळणं हा राजकीय वर्तुळात चर्चेचा विषय बनला आहे. पण आजवर त्यांची जी कारकीर्द राहिली आहे त्यामुळे त्यांचे अनेक राजकीय प्रतिस्पर्धी निर्माण झाले आहेत. ज्या प्रकरणांमध्ये किंवा तपासात ते सक्रिय होते त्यामुळे त्यांच्या हितशत्रूंची यादी खूपच मोठी आहे. अशा परिस्थितीत त्यांचा सुरुवातीपासून आतापर्यंतचा नेमका प्रवास कसा होता हे देखील आपण पाहणार आहोत.

एन्काउंटर स्पेशालिस्ट…

राजेश्वर सिंह हे 1996 च्या बॅचचे पीपीएस अधिकारी आहेत. जेव्हा लखनऊचे डेप्युटी एसपी म्हणून त्यांची नियुक्ती झाली होती तेव्हा सर्वजण त्यांना एन्काउंटर स्पेशालिस्ट या नावाने ओळखत होते. त्याच्या नावावर एकूण 13 एन्काउंटर आहेत. ज्यामध्ये त्याने अनेक खतरनाक गुन्हेगारांशी दोन हात केले होते आणि त्यांना तुरुंगात पाठवलं होतं.

याशिवाय त्यांच्या विभागातील लोक त्यांना सायबर जेम्स बाँड म्हणूनही संबोधायचे. त्यांची एखाद्या प्रकरणाची तपास करण्याची पद्धत ही फारच वेगळी होती. पोलीस दलात रुजू झाल्यानंतर अवघ्या 14 महिन्यांतच त्यांनी स्वतःची वेगळी ओळख निर्माण केली होती.

अनेक घोटाळ्यांची चौकशी करणारे डॅशिंग अधिकारी

2009 मध्ये राजेश्वर सिंह हे प्रतिनियुक्तीवर ईडीमध्ये गेले आणि तिथे त्यांनी सेवा सुरू केली. यूपीए कार्यकाळातील अनेक घोटाळ्यांची त्यांनी चौकशी केली होती. या यादीमध्ये 2G स्पेक्ट्रम घोटाळा, कोळसा घोटाळा, राष्ट्रकुल क्रीडा घोटाळा, ऑगस्टा वेस्टलँड घोटाळा यांचा समावेश आहे.

काँग्रेसचे ज्येष्ठ नेते पी चिदंबरम यांच्याशी त्यांचे संबंध अधिकच ताणलेले होते. दोन प्रकरणं तर अशी होती की, ज्यामध्ये पी चिदंबरम आणि त्यांचा मुलगा किर्ती चिदंबरम यांचा थेट सहभाग असल्याचं बोललं जात आहे. पहिलं प्रकरण म्हणजे ऑगस्टा वेस्टलँड घोटाळा आणि दुसरा एअरसेल-मॅक्सिस करार. दुसऱ्या प्रकरणात राजेश्वर सिंह यांचा पी चिदंबरम यांच्याशी बऱ्याचदा सामना झाला होता.

गोमती रिव्हर फ्रंट प्रकरणातही सक्रिय

याशिवाय माजी मुख्यमंत्री ओमप्रकाश चौटाला, जगन मोहन रेड्डी आणि मधु कोडा यांच्याविरुद्धच्या भ्रष्टाचाराच्या प्रकरणांचीही चौकशी राजेश्वर सिंह यांनी केली होती. राजेश्वर सिंह यांनी राजकारण्यांव्यतिरिक्त सहाराचे प्रमुख सुब्रत राज यालाही तुरुंगात पाठवले होते. त्याच्यावर हाऊसिंग फायनान्सच्या नावाखाली लोकांकडून 24000 कोटी रुपये उकळल्याचा आरोप होता. गोमती रिव्हर फ्रंट प्रकरणाच्या चौकशीतही त्यांचा सक्रिय सहभाग होता.

राजेश्वर सिंह यांच्या वैयक्तिक आयुष्याविषयी बोलायचे झाले तर ते उत्तर प्रदेशातील सुलतानपूर जिल्ह्यातील रहिवासी आहेत. ते अभियांत्रिकी पदवीधर असून त्यांनी कायद्याची पदवीही घेतली आहे. त्यांच्या कुटुंबातील इतर अनेक सदस्यही पोलीस सेवेत आहेत. तसेच त्यांची पत्नी सध्या लखनऊ रेंजच्या आयजी आहेत.

दरम्यान, आता राजेश्वर सिंह यांनी आपल्या नोकरीचा राजीनामा देऊन भाजपमध्ये प्रवेश केल्याने आता राजकीय विरोधक त्यांचा नेमका कसा सामना करणार हे पाहणं देखील महत्त्वाचं ठरणार आहे.