रुपी बँकेला कायमचं लागणार कुलूप, RBI चे आदेश; खातेधारकांचे पैसे बुडणार?

उद्याच बंद होणार बँक, का रद्द केला परवाना?

ऑगस्टमध्ये रिझर्व्ह बँकेने पुणेस्थित रुपी सहकारी बँक लिमिटेडचा परवाना रद्द करण्याचा निर्णय घेतला होता. 22 सप्टेंबर रोजी बँक आपला व्यवसाय बंद ठेवणार आहे. त्यामुळे खात्यातून पैसे काढण्यासाठी ग्राहकांकडे फक्त आजचा दिवस आहे. यानंतर ग्राहक त्यांचे पैसे काढू शकणार नाहीत. आरबीआयच्या म्हणण्यानुसार, रुपी सहकारी बँक लिमिटेडची आर्थिक स्थिती अत्यंत वाईट होती आणि बँकेकडे कोणतेही भांडवल शिल्लक नव्हते. यामुळे RBIनं त्यांचा बँकिंग परवाना रद्द केला.

आरबीआयने ऑगस्टमध्ये केली होती घोषणा

बँकिंग नियमांकडे दुर्लक्ष केल्याबद्दल भारतीय रिझर्व्ह बँकेने रुपी को-ऑपरेटिव्ह बँक लिमिटेडवर मोठी कारवाई केली आहे. बँकेकडे पुरेसे भांडवल आणि कमाईची क्षमता नसल्याने रूपी सहकारी बँकेचा बँकिंग परवाना रद्द करण्यात आला. रिझर्व्ह बँकेने ऑगस्ट महिन्यात ग्राहकांना याबाबत माहिती दिली होती.

रिझर्व्ह बँकेने 10 ऑगस्ट रोजीच एक प्रसिद्धीपत्रक जारी करून याबाबत माहिती दिली होती. यामध्ये रुपी सहकारी बँक लिमिटेडचा बँकिंग परवाना 6 आठवड्यांनंतर रद्द करण्यात येणार असल्याचे सांगण्यात आले. यानंतर बँकेच्या सर्व शाखा बंद होतील आणि ग्राहकांना त्यांच्या खात्यातून पैसे काढता येणार नाहीत. आता 22 सप्टेंबरपासून रिझर्व्ह बँकेचे आदेश लागू होणार असून रुपी को-ऑपरेटिव्ह बँकेचे कामकाज ठप्प होणार आहे.