मोठी बातमी: शरद पवार मोठा निर्णय घेण्याच्या तयारीत? अजित पवार, जयंत पाटलांना दिल्लीत पाचारण

याच पार्श्वभूमीवर आता राष्ट्रवादी काँग्रेसचे अध्यक्ष शरद पवार यांनी उपमुख्यमंत्री अजित पवार आणि राष्ट्रवादी काँग्रेसचे प्रदेशाध्यक्ष जयंत पाटील यांना तातडीने दिल्लीत चर्चेसाठी बोलावलं असल्याची माहिती मिळते आहे. त्यामुळे आता गृहमंत्री बदलले जाणार का चर्चेने पुन्हा एकदा जोर धरला आहे. (sharad pawar will convene a meeting of ncp leaders and hold discussions with ajit pawar and jayant patil)

दुसरीकडे शरद पवार यांनी गृहमंत्री अनिल देशमुख यांच्याशी फोनवरुन चर्चा केली असल्याचं समजतं आहे. परमबीर सिंग यांनी अनिल देशमुखांवर केलेल्या गंभीर आरोपानंतर विरोधकांनी त्यांच्या राजीनाम्याची मागणी केली. यावेळी शिवसेनेचा देखील राष्ट्रवादी काँग्रेसवर दबाव असल्याची चर्चा आहे. त्यामुळे आता शरद पवार या सगळ्या प्रकरणाबाबत नेमका काय निर्णय घेणार हे पाहणं महत्त्वाचं ठरणार आहे.

दरम्यान, आज (21 मार्च) संध्याकाळी 5 वाजता राजधानी दिल्लीत शरद पवार हे बैठक घेणार आहेत. यासाठी थोड्याच वेळात अजित पवार आणि जयंत पाटील हे रवाना होणार आहे. सध्या हे दोन्ही नेते पंढरपूरच्या दौऱ्यावर आहेत.

शरद पवार हे काल वैयक्तिक कारणासाठी आग्रा येथे गेले होते आणि आज दुपारी ते दिल्लीत परतले आहेत. संध्याकाळी 4 वाजता ते जयंत पाटील आणि अजित पवार यांच्याशी चर्चा करणार आहेत. यासाठी या दोन्ही नेत्यांना दिल्लीत बोलवण्यात आलं आहे. दुसरीकडे संजय राऊत हे देखील त्यांना दिल्लीत भेटणार आहेत.

पाहा परमबीर सिंग यांनी गृहमंत्री अनिल देशमुखांवर काय आरोप केले:

अनिल देशमुख यांनी एका कार्यक्रमात बोलत असताना अँटिलीया बाहेर सापडलेल्या स्कॉर्पिओ गाडीतील स्फोटकांचा तपास करत असताना मुंबई पोलिसांकडून आणि आयुक्तांकडून काही चुका झाल्या आणि या चुका माफ करण्यासारख्या नव्हत्या. म्हणूनच परमबीर सिंग यांची बदली करण्यात आल्याचं सांगितलं होतं. त्यानंतर परमबीर सिंग यांनी मुख्यमंत्र्यांना पत्र लिहून आपली बाजू मांडली आहे.

“मार्च महिन्याच्या मध्यावधीत मी वर्षा बंगल्यावर तुम्हाला अँटिलीया बाहेरील तपासाची माहिती देण्यासाठी आलो होतो. त्यावेळी मी या तपासात माननीय गृहमंत्र्यांकडून होत असलेल्या अनेक चुकीच्या गोष्टींबद्दल तुम्हाला माहिती दिली. याबद्दल मी उप-मुख्यमंत्री आणि राष्ट्रवादी काँग्रेसचे नेते शरद पवार यांनाही माहिती दिली. काही मंत्र्यांना माझ्या ब्रिफींगमधले मुद्दे आधीच माहिती असल्याचं माझ्या लक्षात आलं.” या पत्रात पुढे परमबीर सिंग यांनी अनिल देशमुखांनी सचिन वाझेंकडून १०० कोटींची मागणी केल्याचाही उल्लेख केला आहे.

गृहमंत्री अनिल देशमुखांचं ‘ते’ पत्र जसंच्या तसं…

‘क्राईम ब्रांचच्या CIU युनिटचे प्रमुख सचिन वाझे यांना गृहमंत्री अनिल देशमुख यांनी आपल्या ज्ञानेश्वरी या शासकीय बंगल्यावर अनेकदा बोलावलं होतं. वाझे आणि देशमुख यांच्यात अनेकदा मिटींग झाल्या असून यात देशमुखांनी वाझेंना फंड गोळा करण्याविषयी सांगितलं. वाझे आणि गृहमंत्री अनिल देशमुख यांच्या भेटीदरम्यान देशमुख यांचे पर्सनल सेक्रेटरी पालंडेही हजर असायचे.’

‘या बैठकीत देशमुख यांनी वाझे यांच्याकडून प्रत्येक महिन्यात १०० कोटींची मागणी केली. हे टार्गेट पूर्ण करण्यासाठी अनिल देशमुख यांनी सचिन वाझे यांना मुंबईत १ हजार ७५० बार, रेस्टॉरंट व अन्य दुकानं आहेत. प्रत्येक ठिकाणातून २ ते ३ लाख गोळा केले तरीही महिन्याला ४० ते ५० कोटी रुपये सहज जमवता येऊ शकतात. याव्यतिरीक्त अन्य रक्कम ही इतर मार्गाने मिळवता येईल.’ असंही देशमुखांनी सांगितल्याचं परमबीर सिंग यांनी आपल्या पत्रात म्हटलं आहे.

‘मुंबईत सतराशे बार आहेत, रेस्टॉरंट आहेत; ४०-५० कोटी सहज जमू शकतात!’

‘सचिन वाझेंनी त्याच दिवशी माझ्या ऑफिसमध्ये येऊन मला याची माहिती दिली. हे ऐकून मलाही धक्का बसला, परिस्थितीचा कसा सामना करायचा याचाच मी विचार करत होतो. यानंतर काही दिवसांनी सोशल सर्विस ब्रांचमधील ACP पदावर कार्यरत असणाऱ्या संजय पाटील यांना गृहमंत्र्यांनी आपल्या बंगल्यावर बोलावून मुंबईतील हुक्का पार्लरबद्दल चर्चा केली.’

‘दोन दिवसांनी संजय पाटील आणि DCP भुजबळ यांना पुन्हा एकदा गृहमंत्र्यांनी आपल्या बंगल्यावर बोलावून घेतलं. परंतू यावेळी दोघांमध्ये भेट झाली नाही आणि श्री. पालंडे यांनी पाटील व भुजबळ यांना गृहमंत्री गृहमंत्री ४० ते ५० कोटींचा फंड जमवण्याची अपेक्षा करत असल्याचं सांगितलं. पाटील आणि भुजबळ यांनाही पालंडे यांनी रेस्टॉरंट आणि इतर दुकानांवर लक्ष केंद्रीत करायला सांगितलं.’

परमबीर सिंग यांच्या आरोपानंतर अनिल देशमुख राजीनामा देणार का??

‘गृहमंत्री प्रत्येकवेळी माझ्या अधिकाऱ्यांना बंगल्यावर बोलावून पैसे गोळा करण्याविषयी सांगायचे. गृहमंत्र्यांची ही चुकीची कामं माझ्या अधिकाऱ्यांनी मला लक्षात आणून दिली होती.’ परमबीर सिंग यांनी केलेल्या गंभीर आरोपांमुळे या प्रकरणाला आता वेगळं वळण मिळालं आहे.

गेल्या काही दिवसांपासून गृहमंत्री अनिल देशमुख राजीनामा देणार का या चर्चांना उधाण आलं होतं. परमबीर सिंगांच्या पत्रानंतर राज्यातील विरोधक सत्ताधारी पक्षाला आणखी अडचणीत आणण्याचा प्रयत्न करणार आहेत.