Shraddha Walkar : आफताबला फाशी झाली पाहिजे, श्रद्धाच्या वडिलांची आर्त मागणी

काय म्हटलं आहे श्रद्धाचे वडील विकास वालकर यांनी?

माझी मुलगी श्रद्धा वालकरची अत्यंत क्रूर पद्धतीने हत्या करण्यात आली. मला दिल्ली पोलिसांनी आश्वासन दिलं आहे की तुम्हाला न्याय मिळेल. मी आज आपल्या राज्याचे उपमुख्यमंत्री देवेंद्र फडणवीस यांनीही मला न्याय मिळवून देण्याचं आश्वासन दिलं आहे. डॉ. नीलम गोऱ्हे आणि भाजप नेते किरीट सोमय्या यांनीही माझी चौकशी केली. माझी अशी मागणी आहे की माझ्या मुलीसोबत जे काही झालं आहे त्याबाबत मला न्याय मिळावा. आफताबला फाशी झाली पाहिजे अशी मी मागणी करतो आहे.

माझ्या कुटुंबावर खूप मोठा आघात

जी घटना माझ्या मुलीच्या बाबतीत झाली तिचा मृत्यू झाला. त्यामुळे आमच्या कुटुंबावर आघात झाला आहे. माझी प्रकृती बिघडली आहे. त्यामुळे मी फार बोलणार नाही. आत्तापर्यंत झालेल्या तपासाबाबत दिल्ली आणि वसई पोलिसांचं काम व्यवस्थित सुरू आहे. वसईतल्या तुळींज पोलीस स्टेशन आणि माणिकपूर पोलीस स्टेशन यांनी सुरूवातीला असहकार्य दाखवलं. त्याची चौकशी व्हावी कारण तसं झालं नसतं तर आज श्रद्धा जिवंत असती असं मला वाटतं. माझ्या मुलीला न्याय मिळाला पाहिजे. न्याय व्यवस्थेवर माझा विश्वास आहे.

आफताब आणि त्याच्या कुटुंबाला शिक्षा झाली पाहिजे

आफताब पूनावालाला कठोरात कठोर शिक्षा झाली पाहिजे. त्याच्या कुटुंबातले त्याचे आई वडील, भाऊ यांनाही शिक्षा झाली पाहिजे. आफताबने माझ्या मुलीची अत्यंत क्रूर पद्धतीने हत्या केली आहे. त्यामुळे त्याला आणि त्याच्या कुटुंबीयांना शिक्षा झालीच पाहिजे अशी अपेक्षा मी व्यक्त करतो. तसंच सोशल मीडियावरच्या अॅपबाबत जिथे डेटिंग केलं जातं त्याबाबतही सरकारने फेरविचार केला पाहिजे अशीही मागणी मी करतो आहे.

काय आहे प्रकरण?

श्रद्धा वालकर या वसईतल्या तरूणीची तिचा लिव्ह इन पार्टनर आफताब पूनावालाने हत्या केली. तसंच त्याने तिच्या मृतदेहाचे ३५ तुकडे केले. ही सगळी घटना दिल्लीत नोव्हेंबर महिन्यात उघडकीस आली. श्रद्धा वालकरही मुळची वसईची होती. श्रद्धा वालकरने आपल्या प्रियकरासाठी म्हणजेच आफताब पूनावाला साठी वडिलांचं घर सोडलं. लग्न न करताच ती आफताबसोबत लिव्ह इन मध्ये राहू लागली. घरातल्यांनी विरोध केला. आईने समजावलं, वडिलांनी समजावलं पण श्रद्धाने कुणाचंच ऐकलं नाही. मी २५ वर्षांची आहे मला निर्णय घ्यायचा अधिकार आहे असं म्हणत श्रद्धा आफताबसोबत लिव्ह इन मध्ये राहू लागली. याच श्रद्धाचा अत्यंत वाईट पद्धतीने खून झाला आहे. तिची हत्या केल्यानंतर आफताबनेच तिच्या शरीराचे ३५ तुकडे केले.

Shraddha Murder: एक होती श्रद्धा वालकर! प्रेमाच्या ३५ तुकड्यांची आक्रंदणारी कहाणी

मुंबईत असतानाच आफताबला नकोशी झाली होती श्रद्धा?

मुंबईत हे दोघे एकत्र असतानाच आफताबला श्रद्धा नकोशी झाली होती असाही संशय पोलिसांना आहे. श्रद्धाला आफताबशी लग्न करायचं होतं. मात्र आफताब आणि श्रद्धा यांची भेट बंबल या डेटिंग अॅपवर झाली होती. याच अॅपवर त्याची आणखी एका मुलीशी ओळख झाली होती. आफताबला नव्या नात्यात जायचं होतं त्यामुळे त्याला श्रद्धाशी लग्न करण्यात काहीही रस नव्हता. तो दुसऱ्या मुलीसोबत रिलेशनमध्ये होता पण त्याने श्रद्धासोबतचं नातं तोडलं नव्हतं. श्रद्धाच्या घरातले आफताबला आणि आफताबच्या घरातले श्रद्धाला ओळखत होते त्यामुळे आफताब हे नातं तोडत नव्हता. कोव्हिडमुळे श्रद्धाच्या आईचा मृत्यू झाला. आई श्रद्धाची काळजी घेत होती. पण ती नसताना श्रद्धा गायब झाली तरीही कुणी विचारणार नाही हेदेखील आफताबला माहित होतं.

…आणि श्रद्धाच्या प्रेमाचे ३५ तुकडे झाले

श्रद्धाने डोळे झाकून आफताबवर प्रेम केलं. पण आफताबने तिची हत्या केली. त्यानंतर तिच्या मृतदेहाचे तुकडे केले. तुकडे केल्यानंतर रक्त येणार हे त्याला माहित होतं. मग त्याने ते केमिकलही शोधलं ज्यामुळे रक्त स्वच्छ करता येऊ शकतं. सल्फर हायपोक्लोरीक अॅसिडने त्याने रक्ताचे डाग स्वच्छ केले. हे केमिकल वापरल्याने रक्त स्वच्छ होतं आणि फॉरेन्सिकच्या तपासात त्याचे अवशेष मिळत नाहीत. श्रद्धाची हत्या केल्यानंतर त्याने श्रद्धाचे रक्ताळलेले त्याचे आणि श्रद्धाचे कपडे काढले. हे कपडे त्याने एमसीडी कचऱ्याच्या व्हॅनमध्ये फेकले. ज्यामुळे हा पुरावा नष्ट करण्यात त्याला यश आलं.