बुलढाणा : मुलीच्या नातेवाईकांनी घेराव घातला अन्…; पोलीस स्टेशनबाहेरच तरुणावर प्राणघातक हल्ला

घरातून पळून जाऊन लग्न केलेल्या प्रेमी युगुलावर पोलीस ठाण्याच्या बाहेरच हल्ला करण्यात आल्याची धक्कादायक घटना घडली आहे. बुलढाणा जिल्ह्यातील खामगावमधील शिवाजीनगर पोलीस ठाण्यासमोर ही धक्कादायक प्रकार घडला. प्रेमी युगुलाला मुलीकडून नातेवाईकांनी घेरल्यानंतर अज्ञात व्यक्तीने तरुणाच्या पोटात गुप्तीने वार केला. यात तरुण गंभीर जखमी झाला.

पळून गेलेल्या प्रेमी युगुलाने पोलीस स्टेशनमध्ये हजर होत स्वतःच्या मर्जीने लग्न केल्याची माहिती पोलिसांना दिली. त्यानंतर बाहेर पडताना तरुणीच्या नातेवाईकांनी जमाव करून वाद घातला आणि त्यानंतर हा सर्व प्रकार घडला. मंगळवारी (4 जानेवारी) रोजी रात्री 9 ते 10 च्या सुमारास शिवाजीनगर पोलीस स्टेशनसमोर ही घटना घडली.