अनिल परबांवर ED ची कारवाई, उपमुख्यमंत्री अजित पवार म्हणाले..

परिवहन मंत्री अनिल परब यांच्यावर सुरु असलेल्या ईडी कारवाईबाबत अजित पवार यांनी आपली प्रतिक्रिया दिली आहे.
ed action against anil parab deputy chief minister ajit pawar reaction
ed action against anil parab deputy chief minister ajit pawar reaction

मुंबई: दापोली रिसॉर्टप्रकरणी अंमलबजावणी संचलनालयाने (ED) राज्याचे परिवहन मंत्री अनिल परब यांच्याशी संबंधित ठिकाणांवर छापे टाकले आहेत. याचबाबत राज्याचे उपमुख्यमंत्री अजित पवार यांनी आता आपली प्रतिक्रिया दिली आहे. 'तपास यंत्रणांमध्ये कुणाचाही हस्तक्षेप होता कामा नये. पारदर्शकपणे तपास करण्याकरिता कुणाची ना नाहीए. तो अधिकार कायद्याने आणि नियमाने त्यांना दिला आहे. पण त्याचा गैरवापर होऊ नये एवढी माफक अपेक्षा आहे.' असं अजित पवार यावेळी म्हणाले आहेत.

पाहा अजित पवार ईडीच्या कारवाईबाबत काय-काय म्हणाले:

'केंद्रीय यंत्रणांना जो अधिकार दिला आहे त्याचा ते वापर करतात. मागे पण अनेकांच्या बाबतीत इन्कम टॅक्स, सीबीआय, ईडी यांच्याबाबतच्या कारवाया झालेल्या पाहिल्या आहेत. माझ्याही नातेवाईकांबाबत इन्कम टॅक्सने कारवाया केल्या आहेत.' असं अजित पवार यावेळी म्हणाले

'तो त्यांचा अधिकार आहे. त्यांनी धाडी टाकलेल्या होत्या. जो काही त्यांना तपास करायचा होता तो त्यांनी केला. त्याचा अधिकार त्यांना आहे. यामध्ये आत्ताही कारवाई चालू आहे असं मला मगाशी काहींनी सांगितलं. परंतु कोणत्या बेसवर कारवाई चालू आहे हे माहित नाही. कारण मागे पण काही जणांनी सुतोवाच केले होते. अमक्याचा नंबर.. तमक्याचा नंबर.. अशाही गोष्टी काही जणं बोलतात आणि त्या पद्धतीने घडतं.' असं म्हणत अजित पवारांनी नाव न घेता किरीट सोमय्या यांच्यावर टीका केली आहे.

'अशा यंत्रणेत कुणाचाही हस्तक्षेप न होता पारदर्शकपणे तपास केला गेला पाहिजे. तो अधिकार कायद्याने आणि नियमाने त्यांना दिला आहे. पण त्याचा गैरवापर होऊ नये एवढी माफक अपेक्षा आहे.' असं आवाहन अजित पवारांनी केलं आहे.

'मी सकाळी सात वाजता इथे आलोय. जोपर्यंत दुसरी बाजू समजूनच घेतली नाही तर मी आज काही तरी बोलायचं आणि त्यातून तिसरंच काही तरी असायचं. मग पुन्हा ब्रेकिंग न्यूज. त्यामुळे मी बाकीची गोष्ट संपूर्ण माहिती घेतल्याशिवाय सांगणार नाही.' असंही अजित पवारांनी .यावेळी स्पष्ट केलं

'राष्ट्रवादीच्या सहकाऱ्यांवर देखील याआधी अशीच कारवाई झाली आहे. पण कुठलीही कारवाई झाली की त्याला लगेच शिक्षा होते असं नाही. त्याला काही प्रोसस आहे.' असं अजित पवार यावेळी म्हणाले.

ed action against anil parab deputy chief minister ajit pawar reaction
मोठी बातमी: शिवसेनेला सलग दुसऱ्या दिवशी मोठा धक्का, अनिल परबांच्या मालमत्तामंवर ED चे छापे

अनिल परबांवर ईडीची नेमकी कारवाई का?

दापोली, पुणे आणि मुंबई या ठिकाणी ईडीकडून छापेमारी सुरु आहे. तसेच अनिल परब यांच्या जवळच्या लोकांची देखील चौकशी सुरु आहे. ईडीच्या वेगवेगळ्या टीम हे वेगवेगळ्या ठिकाणी छापेमारी करत आहेत.

मिळालेल्या माहितीनुसार, अनिल परब यांनी दापोलीमध्ये जो रिसॉर्ट बांधला आहे याच रिसॉर्टसंबंधीच जी केस होती त्याचसंदर्भात ईडीने ही मनी लाँड्रिंगची केस घेतली आहे. ईडीने आजच याबाबत चौकशी आणि छापेमारी सुरु केली आहे. दापोली आणि रत्नागिरी येथे अद्यापही ईडीकडून छापेमारी सुरुच आहे.

अनिल परब यांनी दापोलीत एक रिसॉर्ट बांधला होता. त्याच रिसॉर्टला नॉन-अॅग्रीकल्चरल म्हणून टॅग केलं होतं. त्यानंतर अशीही माहिती समोर आली की, त्या जमिनीची जी किंमत होती ती देखील त्यांनी खोटी दाखवली होती. त्याशिवाय जो सात-बाराचे रेकॉर्ड होते. ते NA मध्ये सापडले नाही.

भाजप नेते किरीट सोमय्या यांनी देखील या रिसॉर्टविरुद्ध अनेक तक्रारी केल्या होत्या. याच रिसॉर्टवर कारवाई देखील करण्यात आली होती. जेव्हा चौकशी झाली तेव्हा असं समजून आलं की, या सगळ्या व्यवहारात काही फेरबदल करण्यात आलं होतं.

Related Stories

No stories found.
Mumbai Tak
www.mumbaitak.in