एकनाथ शिंदे, देवेंद्र फडणवीस आणि राज ठाकरे उद्या 'शिवाजी पार्क'वर एकत्र!

शिवाजी पार्क दीपोत्सव : मनसेच्या कार्यक्रमाला मुख्यमंत्री शिंदे, उपमुख्यमंत्री फडणवीस राहणार हजर
एकनाथ शिंदे, देवेंद्र फडणवीस आणि राज ठाकरे उद्या 'शिवाजी पार्क'वर एकत्र!

राज्यातल्या राजकारणात सातत्यानं मनसे-भाजप युतीच्या चर्चा होत असतात. मुंबई महापालिका निवडणुकीत मनसे-भाजप एकत्र येऊ शकते, अशी चर्चा राजकीय वर्तुळात होत असते. महत्त्वाचं म्हणजे गेल्या काही महिन्यात भाजप-मनसे जवळ येताना दिसत असतानाच आता राज ठाकरे, मुख्यमंत्री एकनाथ शिंदे आणि उपमुख्यमंत्री देवेंद्र फडणवीस हे शिवाजी पार्कवरील कार्यक्रमात एकत्र दिसणार आहेत.

महाराष्ट्र नवनिर्माण सेनेच्या वतीने मुंबईतल्या शिवाजी पार्क मैदानावर 'शिवाजी पार्क दीपोत्सव' कार्यक्रमाचं आयोजन करण्यात आलं आहे. शुक्रवारी (२१ ऑक्टोबर) दीपोत्सव कार्यक्रमाला सुरूवात होणार आहे.

मनसेच्या कार्यक्रमानिमित्त तीन महत्त्वाचे नेते एकत्र येणार आहे. या कार्यक्रमाचं उद्घाटन एकनाथ शिंदे यांच्या हस्ते होणार असून, उपमुख्यमंत्री देवेंद्र फडणवीस यांची या कार्यक्रमाला उपस्थिती असणार आहे. सायंकाळी ५.३० वाजता स्व. मीनाताई ठाकरे यांच्या पुतळ्याजवळ हा कार्यक्रम होणार आहे.

मुंबई महापालिका निवडणुकीशी कनेक्शन?

दीपोत्सवाच्या कार्यक्रमानिमित्त राज ठाकरे, एकनाथ शिंदे आणि देवेंद्र फडणवीस एकत्र येत आहे. मात्र, तिन्ही नेत्यांच्या एकत्र येण्याचं कनेक्शन मुंबई महापालिका निवडणुकीशीही लावलं जात आहे. राज ठाकरे आणि देवेंद्र फडणवीस यांच्या गेल्या काही महिन्यात भेटी झाल्या आहेत. भाजपच्या नेत्यानीही राज ठाकरेंच्या भेटी घेतल्या आहेत. राज्यातल्या सत्तांतरानंतर बहुमत चाचणीवेळीही मनसेनं शिंदे-फडणवीस सरकारला पाठिंबा दिला.

उद्धव ठाकरे भाजपपासून दूर गेले असून, शिवसेनेतल्या फुटीनंतर ठाकरे नाव सोबत घेण्याच्या दृष्टीनं भाजपचे प्रयत्न असल्याची चर्चाही गेल्या काही दिवसांपासून होतेय. मुंबई महापालिकेची सत्ता ताब्यात घेण्यासाठी भाजपनं लक्ष केंद्रीत केलंय. त्यामुळेच आगामी महापालिका निवडणुकीत मनसे, शिंदे गटाला भाजप सोबत घेऊ शकतं किंवा निकालानंतर मनसेची मदत घेतली जाऊ शकते अशीही चर्चा आहे. त्यामुळेच शिंदे, ठाकरे, फडणवीस यांचं एकत्र येणं महत्त्वाचं मानलं जात आहे.

शिंदेंकडून ठाकरे सोबत असल्याचा प्रयत्न

उद्धव ठाकरेंच्या नेतृत्वाला आव्हान देत शिंदेंनी भाजपसोबत घरोबा केला. मुख्यमंत्री झाल्यानंतर शिंदेंकडून ठाकरे कुटुंब आपल्यासोबत असल्याचा प्रयत्नही झालाय. शिंदेंनी घेतलेल्या दसरा मेळाव्यात जयदेव ठाकरे, स्मिता ठाकरे, निहार ठाकरे हे उपस्थित होते. त्यातून बाळासाहेब ठाकरेंचं कुटुंबाचा आपल्याला पाठिंबा असल्याचा संदेश देण्याचा प्रयत्न शिंदेंकडून केला गेला. आता शिंदे आणि राज ठाकरे एका मंचावर येणार आहेत.

Related Stories

No stories found.
Mumbai Tak
www.mumbaitak.in