प्रस्थापितांविरोधात लढा

नागपूर पदवीधर मतदारसंघातून महाविकास आघाडीकडून काँग्रेसचे अभिजीत वंजारी विजयी झाले, तर भाजपचे सुधाकर कोहळे यांचा पराभव झाला. मात्र, या निवडणुकीत खरी रंगत आणली ती नितेश कराळे ऊर्फ कराळे मास्तर यांनी. कोणतीही राजकीय पार्श्वभूमी नसताना, विदर्भातील साध्या कुटुंबातून आलेल्या आणि एमपीएससीच्या विद्यार्थ्यांना आपल्या अनोख्या शैलीत शिकवणाऱ्या कराळे मास्तरांनी अपक्ष अर्ज दाखल केला. राष्ट्रवादी काँग्रेस पक्षाने (शरदचंद्र पवार) त्यांची हकालपट्टी केली, तरीही न डगमगता त्यांनी प्रस्थापितांविरोधात लढा दिला. या निवडणुकीत त्यांना तब्बल 24,249 पहिल्या पसंतीची मते मिळाली आणि ते मतमोजणीत तिसऱ्या क्रमांकावर राहिले. 

हे ही वाचा : अर्णब चक्रीवादळानंतर नवी प्रणाली सक्रिय, राज्यात कुठे पावसाचा इशारा?

रविराज साबळे यांची ताकद

दुसरीकडे, छत्रपती संभाजीनगर पदवीधर मतदारसंघातून संगणक अभियंता असलेल्या आणि शेतीविषयक प्रश्नांवर आक्रमक बोलणाऱ्या रविराज साबळे पाटील यांनी आपली ताकद दाखवून दिली. या मतदारसंघातून राष्ट्रवादी काँग्रेसचे (शरदचंद्र पवार पक्ष) प्रतापसिंह पाटील विजयी झाले, तर माजी आमदार सतीश चव्हाण पराभूत झाले. या निवडणुकीत कोणतीही मोठी संघटना किंवा राजकीय पाठबळ नसताना रविराज साबळे यांनी 19,835 पेक्षा जास्त मते मिळवत प्रस्थापितांना मोठा धक्का दिला.

हे ही वाचा : महाराष्ट्रात दररोज सरासरी 8 शेतकऱ्यांची आत्महत्या, RTI मधून धक्कादायक माहिती समोर, 2022 पासून काय घडलं?

प्रस्थापितांबद्दलचा वाढता अविश्वास

कराळे मास्तर आणि रविराज साबळे यांच्यासारख्या अपक्ष चेहऱ्यांच्या मागे हजारो मतदार उभे राहण्यामागे प्रस्थापितांबद्दलचा वाढता अविश्वास हे मुख्य कारण मानले जात आहे. प्रस्थापित नेते आपल्या संस्था, कारखाने आणि स्वतःचे राजकीय अस्तित्व टिकवण्यासाठी कधीही भूमिका बदलू शकतात, अशी भावना तरुण मतदारांमध्ये निर्माण झाली आहे. तसेच प्रस्थापित नेते आब राखून केवळ राजकीय आंदोलने करतात, तर हे तरुण नेते थेट रस्त्यावर उतरून सामान्यांचे, तरुणांचे आणि शेतकऱ्यांचे प्रश्न मांडतात. 

हे ही वाचा : 'फेकनाथ मिंधेला एवढी हिंमत असती ना तर...', आदित्य ठाकरे ठाण्यात जाऊन शिंदेंवर बरसले!

नेते आणि सर्वसामान्य जनता यांच्यात निर्माण झालेले मोठे अंतर पुसून टाकण्याची इच्छा या मतदानातून दिसून आली आहे. केवळ पैसा, प्रतिष्ठा आणि पक्षाच्या जोरावर निवडणुका जिंकता येतात हा जुना समज आता बदलताना दिसत आहे. नागपूर असो वा छत्रपती संभाजीनगर, जनतेने प्रस्थापितांना दिलेला हा कौल ही भविष्यातील राजकारणासाठी मोठी धोक्याची घंटा मानली जात आहे. जर प्रस्थापित नेत्यांनी वेळीच आत्मपरीक्षण केले नाही, तर आगामी काळात प्रत्येक मतदारसंघात असे 'कराळे मास्तर' आणि 'रविराज साबळे' उभे राहून प्रस्थापितांना आव्हान देतील यात शंका नाही.