मोहिते पाटलांवर बरसले, अकलूजमध्ये सभा ठरली; विजयानंतर राजेंद्र राऊतांची प्रतिक्रिया
Rajendra Raut : विधानपरिषद निवडणुकीतील विजयानंतर राजेंद्र राऊत यांनी पहिली प्रतिक्रिया देत मतदारांचे आभार मानले. यावेळी त्यांनी मोहिते पाटील यांच्यावर टीका करत आगामी राजकीय लढतींचे संकेत दिले.
ADVERTISEMENT
बातम्या हायलाइट
मोहिते पाटलांवर बरसले, अकलूजमध्ये सभा ठरली
विजयानंतर राजेंद्र राऊतांची प्रतिक्रिया
Rajendra Raut on Dhairyasheel Mohite Patil, Solapur : विधानपरिषद निवडणुकीतील विजय मिळवल्यानंतर राजेंद्र राऊत यांनी पहिली प्रतिक्रिया देताना हा विजय सर्वसामान्य कार्यकर्त्यांचा आणि जिल्ह्यातील जनतेच्या विश्वासाचा असल्याचे म्हटले. विधानसभेच्या निवडणुकीत अपयश आले असले तरी त्यानंतर बाजार समिती, नगरपालिका, जिल्हा परिषद आणि पंचायत समिती अशा विविध निवडणुकांमध्ये मिळालेल्या यशामुळे जनतेचा पाठिंबा सातत्याने मिळत असल्याचे त्यांनी सांगितले. आपल्या मतदारसंघात मोठे मताधिक्य मिळाले असून संपूर्ण जिल्ह्यातील लोकांची भावना होती की काम करणारा कार्यकर्ता विधान परिषदेत पोहोचला पाहिजे, असे राऊत यांनी नमूद केले. सर्व मतदार बंधू-भगिनींनी दाखविलेल्या विश्वासामुळे हा विजय शक्य झाल्याचे सांगत त्यांनी मतदारांचे आभार मानले. ते सोलापुरातील पत्रकार परिषदेत बोलत होते.
हेही वाचा : भास्कर जाधव म्हणाले, 'नार्वेकर कोण लागून गेला?' आता मिलिंद नार्वेकरांचं जोरदार प्रत्युत्तर
राऊतांचा मोहिते पाटलांवर निशाणा
विजयानंतर बोलताना राऊत यांनी मोहिते पाटील यांच्यावर थेट निशाणा साधला. निवडणुकीपूर्वी अदृश्य शक्ती आपल्या पाठीशी असल्याचे सांगत मोठ्या फरकाने विजयाचा दावा करण्यात आला होता, मात्र प्रत्यक्ष निकालाने वेगळे चित्र दाखवून दिल्याचे त्यांनी म्हटले. गेल्या दीड महिन्यांपर्यंत सर्वांशी आपले चांगले संबंध होते, परंतु काही जणांच्या अहंकारामुळे परिस्थिती बदलल्याचा आरोप त्यांनी केला. एखाद्या सर्वसामान्य कार्यकर्त्याला बळीचा बकरा करण्याचा प्रयत्न झाला, असा दावा करत जर खरोखरच लढण्याची तयारी होती तर स्वतःच्या घरातील उमेदवार मैदानात उतरवायला हवा होता, असेही त्यांनी म्हटले. आपण कोणाचे उणे-दुणे काढण्याच्या भूमिकेत नसल्याचे सांगतानाच आरोप झाले तर त्याला उत्तर देण्यास आपण सक्षम असल्याचेही त्यांनी स्पष्ट केले.
हेही वाचा : Maharashtra Weather : हवामानात उलटफेर, येत्या काहीच तासांत मान्सून धुमाकूळ घालणार; पण..
