भाजपची साथ सोडण्याची अट

काही काळापूर्वी अजित पवारांच्या अचानक झालेल्या निधनानंतर दोन्ही राष्ट्रवादी काँग्रेस एकत्र येण्याच्या आणि महायुतीसोबत जाण्याच्या जोरदार चर्चा रंगल्या होत्या. मात्र, केंद्रीय पातळीवर सीबीआय, ईडीच्या मुद्द्यांवरून आणि स्थानिक पातळीवर एमपीएससी विद्यार्थ्यांच्या आंदोलनांनंतर निर्माण झालेल्या सरकारविरोधी वातावरणामुळे विरोधी पक्षांचे राजकारण बदलले आहे. पूर्वी शरद पवार गटातील नेत्यांना सत्तेत किंवा केंद्र सरकारमध्ये पदे मिळतील अशा चर्चा दबक्या आवाजात सुरू होत्या. परंतु, रोहित पवार यांनी भाजपची साथ सोडण्याची अट समोर ठेवून राष्ट्रवादी काँग्रेस केवळ सत्तेसाठीच राजकारण करते हा समज मोडीत काढण्याचा प्रयत्न केला आहे. विलिनीकरण न झाल्यास त्याचे खापर आपल्यावर फुटू नये आणि आपण विचारसरणीशी प्रामाणिक आहोत, हे दाखवून देत त्यांनी स्वतःचा पक्ष सेफ झोनमध्ये ठेवण्याचे राजकीय कार्ड खेळल्याचे दिसते.

हे ही वाचा : राष्ट्रीय चित्रपट पुरस्कार सोहळा गुजरातला हलवला, राज ठाकरे संतापले, मोदी-शाहांवर हल्लाबोल

तो एक दिवस नक्की येईल

याच दरम्यान रोहित पवार यांची काँग्रेसच्या बड्या नेत्यांशी वाढती जवळीक ही महाराष्ट्राच्या राजकारणात नवीन समीकरणांची नांदी मानली जात आहे. दिल्लीत काँग्रेस अध्यक्ष मल्लिकार्जुन खरगे आणि केसी वेणुगोपाल यांच्यासोबत झालेल्या बैठकीत, काँग्रेस नेतृत्वाने रोहित पवार यांना 'लढत राहा, एक दिवस आपल्या विचारधारेचा नक्की येईल' असा सल्ला दिल्याची माहिती समोर येत आहे. राहुल गांधी यांच्याप्रमाणेच रोहित पवार यांनीही पुण्यातील एमपीएससी आंदोलनादरम्यान हातात संविधानाचे पुस्तक धरून आपल्या राजकीय विचारसरणीचा स्पष्ट मेसेज देण्याचा प्रयत्न केला. पूर्वी ज्या रोहित पवारांच्या सत्ताधारी सरकारमध्ये सहभागी होण्याच्या चर्चा होत्या, तेच आता शेतकऱ्यांचे प्रश्न, एमपीएससी परीक्षेतील गैरव्यवहार आणि कायदा-सुव्यवस्थेच्या मुद्द्यांवर थेट रस्त्यावर उतरून सरकारला धारेवर धरताना दिसत आहेत.

हे ही वाचा : मुंबईची खबर : मुंबईकरांनो, गणेशोत्सवासाठी गावी जाताय? 'हा' पास असल्यास मिळणार टोलमाफी

विरोधी पक्षाच्या राजकारणाला नवी धार

सध्या महाराष्ट्रात विधानसभेत किंवा विधानपरिषदेत अधिकृत विरोधी पक्षनेता नसताना, रोहित पवार यांनी विरोधी पक्षाची ही पोकळी भरून काढण्याचा प्रयत्न सुरू केला आहे. मुंबई, पुणे, संभाजीनगर, भंडारा ते अगदी कल्याणपर्यंत विविध जनआंदोलनांमध्ये थेट सहभाग नोंदवून आणि पत्रकार परिषदा घेऊन ते आंदोलनाचा मुख्य चेहरा बनत आहेत. राज्यातील तरुणांमधील असंतोष आणि सरकारच्या विरोधातील वातावरणाचा अंदाज घेऊन रोहित पवार यांनी विरोधी पक्षाच्या राजकारणाला नवी धार दिली आहे. काँग्रेस पक्षाकडून मिळणारे बॅकिंग आणि विचारसरणीशी तडजोड न करण्याची भूमिका यांमुळे येत्या काळात रोहित पवार यांच्या नेतृत्वाखाली विरोधी पक्षाची आंदोलने आणखी तीव्र होण्याची स्पष्ट चिन्हे दिसत आहेत.