शंभरावी कसोटी आणि विराट-सचिनची तुलना, कोहली मोडू शकेल का तेंडुलकरचा रेकॉर्ड?

भारतीय संघाचं नेतृत्व आपल्या हाती आल्यानंतर विराटने संघासाठी आपलं सर्वतोपरीने योगदान दिलं. आंतरराष्ट्रीय क्रिकेटमध्ये भारताची छबी आक्रमक देश म्हणून तयार करण्यात सौरव गांगुलीनंतर विराट कोहलीचा मोठा वाटा आहे. विराटच्या खेळावर फिदा झालेल्या अनेक माजी क्रिकेटपटूंनी त्याची तुलना सचिन तेंडुलकरसोबत केली आहे. इतकच काय तर खुद्द सचिननेही एका कार्यक्रमात आपले रेकॉर्ड कोणी मोडू शकेल असं वाटतं का असा प्रश्न विचारला असता विराट कोहली आणि रोहित शर्मा या दोन खेळाडूंचं नाव घेतलं होतं.

भारताचा दुसरा सचिन तेंडुलकर बनण्याच्या वाटेवर असलेल्या विराटची घौडदौड गेल्या काही वर्षांपासून चांगली सुरु होती. परंतू प्रत्येक खेळाडूच्या आयुष्यात जसा बॅडपॅच येतो तसाच विराटच्या आयुष्यात आला. कर्णधारपदाची जबाबदारी, मोठ्या स्पर्धांमध्ये भारताला विजेतेपद मिळवून देण्याची हुकलेली संधी आणि त्यामुळे धावांचा आटलेला ओघ अशा दुष्टचक्रात विराट गेली काही वर्ष अडकला आहे. याचंचं एक उदाहरण म्हणून सांगायला गेलं तर २०१९ मध्ये विराटने घरच्या मैदानावर बांगलादेशविरुद्ध कसोटी सामन्यात शतक झळकावलं होतं. यानंतर शतकी खेळी ही विराटवर अशी काही नाराज झाली आहे की अद्याप कसोटी क्रिकेटमध्ये विराटला शतक झळकावता आलेलं नाही.

विराटसारख्या खेळाडूच्या करिअरमध्ये अशी वेळ का यावी असा प्रश्न अनेकांना पडला असेल? एक क्रिकेटचा चाहता म्हणून तो प्रश्न माझ्याही मनात आला होता. त्यामुळे या गोष्टीचा शांतपणे विचार करायला गेला तर एक कारण प्रामुख्याने समोर येतं ते म्हणजे, विराटच्या खांद्यावर आलेली कर्णधारपदाची जबाबदारी आणि कर्णधार म्हणून काम पाहताना महत्वाच्या स्पर्धांमध्ये आलेलं अपयश. जवळपास सात वर्षांचा कालावधी विराटने भारतीय संघाचं आंतरराष्ट्रीय क्रिकेटमध्ये नेतृत्व केलं. या काळात तो फलंदाजीही चांगली करत होता. परंतू २०१७ चॅम्पिअन्स ट्रॉफी दरम्यान झालेला वाद, २०१९ वर्ल्डकप मध्ये झालेली हाराकिरी एक कर्णधार आणि खेळाडू म्हणून विराटला चांगलीच महागात पडली आहे असं सारखं वाटत राहतं.

खेळाडू म्हणून विराट कोहलीच्या कर्तृत्वावर कधीच शंका घेण्याचं कारण नाही. परंतू दोन वेळेला आयसीसी स्पर्धांचं विजेतेपद मिळवण्याची संधी आलेली असतानाही विराट कर्णधार म्हणून तिकडे कमी पडत गेला. त्यामुळे साहजिकच कर्णधार म्हणून विराटच्या कामगिरीवर प्रश्नचिन्ह निर्माण व्हायला लागली. पहिल्या वहिल्या वर्ल्ड टेस्ट चॅम्पिअनशीपमध्येही विराटच्या नेतृत्वाखाली भारतीय संघ दृष्ट लागावी असा खेळवा. परंतू अंतिम सामन्यात न्यूझीलंडविरुद्ध पुन्हा एकदा विराटसेनेने विजेतेपदाची संधी गमावली आणि त्याच दरम्यान BCCI मध्ये विराटला कर्णधार म्हणून हटवण्याची प्रक्रीया सुरु झाली. तुम्ही कितीही नाकारायला गेलात तरीही या घटनांमुळे निर्माण होणाऱ्या परिस्थितीचा परिणाम खेळाडूवर नक्कीच होतो. विराटच्या बाबतीतही दुर्दैवाने का होईना हाच प्रकार घडला.

एक खेळाडू, फलंदाज म्हणून तुम्ही कितीही चांगले असलात तरीही कर्णधार म्हणून तुम्ही संघाला विजेतेपद मिळवून देत नसाल तर साहिजकच तुमच्यावर दडपण हे येणारच आणि त्याचा फटका तुमच्या कामगिरीवर होणार हे स्पष्ट आहे. विराट कोहली ज्या सचिन तेंडुलकरला आपला आदर्श मानतो, त्याचं अनुकरण करण्यात तो या बाबतीत कमी पडला. सचिनकडेही भारतीय संघाचं कर्णधारपद सोपवण्यात आलं होतं. परंतू कर्णधारपदाच्या कारकिर्दीत त्याचीही कामगिरी फारशी वाखणण्याजोगी नव्हती. ज्यावेळीस हे कर्णधारपद आपल्यातल्या खेळाडूसाठी त्रासदायक होतंय असं वाटत असतानाच सचिनने ही जबाबदारी आपल्या खांद्यांवरुन खाली उतरवली. यानंतर सचिन एक खेळाडू म्हणून संघात राहिला आणि तो आपली भूमिका बजावत राहिला. विराटलाही हा मार्ग स्विकारता आला असता, परंतू दुर्दैवाने हे ओळखण्यात त्याने उशीर केला असं वाटत राहतं.

सचिन तेंडुलकर आपल्या करिअरचा १०० वा कसोटी सामना २००२ साली इंग्लंड दौऱ्यात ओव्हलच्या मैदानावर खेळला होता. या सामन्यात त्याने ५४ धावांची खेळी केली होती. जर आपण सचिनच्या कारकिर्दीचा विचार केला तर कर्णधार म्हणून असताना त्याने केलेल्या खेळीपेक्षा खांद्यावर कर्णधारपदाची जबाबदारी नसताना त्याने केलेली खेळी ही नक्कीच उजवी ठरेल. तुमच्याकडे कर्णधारपद नसलं तरीही तुमचं संघातलं महत्व हे कधीच कमी होत नसतं. भारताचा यशस्वी कर्णधार म्हणून ओळख असलेल्या धोनीनेही कर्णधारपदाचा राजीनामा देऊन विराटच्या हाताखाली खेळणं पसंत केलं. परंतू त्यावेळेसही धोनीचं संघातलं महत्व हे तितकंच अबाधित होतं.

विराटचा प्लस पॉईंट आहे तो म्हणजे त्याची बॅटींग. या बॅटींगच्या जोरावर त्याने संघाला अनेक सामना जिंकवून दिले आहेत. तो मैनावार फलंदाजीसाठी असेल तर त्याला आऊट कसं करायचं असा प्रश्न समोरच्या गोलंदाजांना पडतो. अशावेळी तुमच्या डोक्यावर जर कर्णधारपदाचं टेन्शन नसेल तर तुम्ही अधिक खुलून खेळू शकता. सचिन आणि विराटची नेहमी तुलना केली जाते. म्हणून ९९ वी कसोटी खेळल्यानंतर दोन्ही खेळाडूंच्या कसोटी आकडेवारीतला एक फरक आपण जाणून घेऊयात…

सचिन तेंडुलकर ९९ वी कसोटी खेळल्यानंतर –

१५९ इनिंगमध्ये, ८३५१ धावा, ३० शतकं आणि ३३ अर्धशतकं

आता विराटच्या आकडेवारीवर जर आपल्याला नजर टाकायची असेल तर ती २०१९ पासून आपल्या समोरच आहे. दोन वर्षांत एकही शतक न झळकावलेल्या विराटने श्रीलंकेविरुद्ध मोहाली टेस्टमध्ये ८ हजार धावांचा टप्पा ओलांडला आहे. आपल्या शंभराव्या कसोटी सामन्याच्या पहिल्या डावातही विराट ४५ धावा काढून माघारी परतला. २०१७ हे वर्ष विराट कोहलीच्या कारकिर्दीत खेळाडू म्हणून सर्वोत्तम ठरलं.

यावर्षात विराटने आंतरराष्ट्रीय क्रिकेटमध्ये ११ शतकं झळकावली. परंतू यानंतर दुर्दैवाने शतकांचा निकष बघितला तर विराटच्या कामगिरीत प्रगती नाही पण हळूहळू अधोगतीच झाली आहे. २०१८ साली ११ शतकं, २०१९ साली सात शतकं आणि त्यानंतर आतापर्यंत शतकाची पोटी कोरी असणं हे खूप काही सांगून जातं.

विराट कोहली एक प्रतिभावान खेळाडू आहे यात काही शंकाच नाही. सचिन तेंडुलकरचा १०० शतकांचा विक्रम विराट कोहली मोडेल असं नेहमी बोललं जातं. यासाठीही विराटला आंतरराष्ट्रीय क्रिकेटमध्ये ३१ शतकं करावी लागतील. परंतू यासाठी विराटला यापुढच्या काळाता फक्त आणि फक्त आपल्या फलंदाजीवर लक्ष केंद्रीत करावं लागणार आहे. विराटचं वय त्याच्या हातात आहे हा सर्वात मोठा प्लस पॉईंट आहे. पुढची किमान ४ ते ५ वर्ष विराट क्रिकेट खेळेल असा अंदाज व्यक्त केला जातो आहे. विराटच्या फिटनेसबद्दल कोणाच्याही मनात कधीच शंका नव्हती. त्यामुळे सचिनचा विक्रम मोडण्याची चांगली संधी विराटच्या हातात आहे. जर विराट हे खरंच करु शकला तर त्याच्यासारखा ग्रेट खेळाडू कोणीच नसेल. खुद्द सचिनलाही याचा आनंद होईल. पण हा मैलाचा दगड पार करायचा असेल तर पुढचा रस्ता देखील तितक्याच सावधतेने विराटला पार करावा लागेल. पाहूया, काय होतंय हे भविष्यात हे येणारा काळचं सांगेल.