आत्महत्या करू नये म्हणून पोरगा वडिलांना सोडेना, आदित्य ठाकरेंची पाच हजारांची मदत

हेही वाचा : खासदार बाळ्या मामांच्या मतदारसंघात वाहतूक कोंडीचा कहर, मुंबई-नाशिक महामार्गावर तब्बल 15 किमी ट्रॅफिक जाम!

चिमुकल्याला आपल्या वडिलांच्या जीवाची चिंता 

या परिस्थितीत सर्वात मोठी चिंता या चिमुकल्याला आपल्या वडिलांच्या जीवाची आहे. वडील आत्महत्या करण्याबाबत बोलत असल्याने मुलगा सतत त्यांच्या मागे फिरत असल्याचे त्याने सांगितले. यापूर्वी आईजवळ झोपणारा हा मुलगा गेल्या दीड ते अडीच महिन्यांपासून वडिलांजवळ झोपत आहे. वडील घराबाहेर पडले की तोही त्यांच्या मागे जातो. वडील शेताकडे निघाले की, शाळेत जाण्याऐवजी त्यांच्यासोबत शेतात येतो. शेतात काम नसतानाही वडिलांना एकटे सोडण्याची त्याची तयारी नसते. वडिलांनी आपल्याला सोडून कुठे जाऊ नये आणि ते सुरक्षित राहावेत, यासाठी तो सतत त्यांच्यासोबत राहत असल्याचे त्याने सांगितले. घरात खाण्यासाठी राशन नसल्याचेही त्याने सांगितले.

हेही वाचा : ठाकरे बंधूंनी निवडणूक आयोगाविरुद्ध थोपटले दंड! मुंबईत काढणार जनमोर्चा

आदित्य ठाकरेंकडून तातडीची पाच हजार रुपयांची आर्थिक मदत 

यावेळी आदित्य ठाकरे यांनी या कुटुंबाशी संवाद साधून त्यांना धीर दिला. चिमुकल्याशी बोलताना त्याने वडिलांच्या मागे का फिरतो, याची विचारणा केली. त्यावर वडील आत्महत्या करू नयेत म्हणून आपण त्यांच्यासोबत राहत असल्याचे मुलाने सांगितले. कुटुंबाची परिस्थिती समजल्यानंतर आदित्य ठाकरे यांनी तातडीची पाच हजार रुपयांची आर्थिक मदत केली. मदत मिळाल्यानंतर वडिलांनी घरातील गरजेच्या वस्तू आणणे आणि मुलाच्या गरजा भागवणे याला प्राधान्य देणार असल्याचे सांगितले. दवाखान्याच्या खर्चापेक्षा मुलाच्या तोंडात अन्न जावे, अशी परिस्थिती असल्याचे त्यांनी सांगितले.

या कुटुंबाने सरकारने शेतकऱ्यांच्या पाठीशी उभे राहण्याची मागणी केली आहे. दुष्काळामुळे शेतीचे उत्पन्न गेले असून पीक विम्याची मदतही मिळाली नसल्याची व्यथा त्यांनी मांडली. 10 एकर शेती असूनही घरात पैसे नसल्याचे वडिलांनी सांगितले. आदित्य ठाकरे यांनी शेतकऱ्यांना संकटाच्या काळात मदत करण्याचे आश्वासन दिल्याचेही त्यांनी सांगितले. दरम्यान, या कुटुंबाची परिस्थिती पाहता मुलाच्या शिक्षणापासून घरातील अन्नधान्यापर्यंत अनेक प्रश्न निर्माण झाले आहेत. मात्र या सर्व परिस्थितीत चिमुकल्याच्या मनात आपल्या वडिलांच्या सुरक्षिततेची निर्माण झालेली भीती ही या कुटुंबाच्या संकटाची गंभीरता दाखवून देते.