MPSC पेपर फुटी प्रकरणात मोठी बातमी, 'आदर्श' क्रीडा शिक्षक कसा सापडला?

अन्न व औषध प्रशासनातील औषध निरीक्षक पदासाठी 22 मार्च 2026 रोजी परीक्षा घेण्यात आली होती. या परीक्षेपूर्वी ऋतुजा पाटील हिला प्रश्न मिळाल्याची माहिती समोर आल्यानंतर पेपरफुटीचे प्रकरण उघडकीस आले. तिच्याकडे मिळालेल्या प्रश्नांपैकी ७७ ते ७८ प्रश्न प्रत्यक्ष परीक्षेत आले होते. याबाबत पोलिसांकडून पडताळणी सुरू आहे.

हेही वाचा : मावस मेहुण्याच्या प्रेमात पडली पत्नी, दोघांनी मिळून काढला पतीचा काटा, घरमालकावर आळ यावा म्हणून...

या प्रकरणात ऋतुजा पाटील हिच्या वडिलांचे नावही समोर आले आहे. अमृत पाटील यांनी प्रश्न मिळवण्यासाठी कौटिल्य अकादमीचा संचालक प्रवीण पाटील याला 12 लाख रुपये दिल्याची माहिती आहे. मुलीच्या लग्नासाठी जमवलेल्या पैशांचा या कामासाठी वापर करण्यात आल्याचा संशय व्यक्त केला जात आहे. या आर्थिक व्यवहाराबाबत पोलिसांकडून तपास सुरू आहे. दरम्यान, ऋतुजा पाटील हिने तिच्या मैत्रिणीशी केलेल्या व्हॉट्सअॅप संभाषणाचा स्क्रीनशॉट पोलिसांच्या हाती लागला. या संभाषणातून तपासाला नवी दिशा मिळाली. प्रश्न नेमके कसे मिळाले आणि या प्रकरणात आणखी कोणाचा सहभाग आहे, याचा शोध घेण्यासाठी पोलिसांकडून तपास केला जात आहे.

मयूर ठाकरेचे नाव कसे समोर आले? 

ऋतुजाच्या व्हॉट्सअॅप संभाषणातून मिळालेल्या धाग्यांच्या आधारे मयूर ठाकरे याचे नाव तपासात पुढे आले. अमृत पाटील आणि प्रवीण पाटील यांच्यातील संपर्काचा दुवा म्हणून मयूरकडे पाहिले जात आहे. या माहितीच्या आधारे पोलिसांनी मयूरसह अन्य संशयितांचा शोध सुरू केला होता. मात्र, मयूर फरार असल्याने त्याचा शोध घेण्याचे आव्हान पोलिसांसमोर होते. अखेर मुंबई गुन्हे शाखेने सोमवारी त्याला अटक केली. या प्रकरणातील आर्थिक व्यवहार, प्रश्न मिळवण्याची पद्धत आणि संबंधित व्यक्तींमधील संपर्क याबाबत तपास सुरू आहे. मयूरच्या अटकेमुळे या प्रकरणातील संपर्कांची साखळी आणि इतर संशयितांबाबत अधिक माहिती समोर येण्याची शक्यता आहे.

क्रीडा शिक्षक म्हणून कार्यरत पण पेपरफुटीत सहभागी

मयूर ठाकरे हा नंदुरबार शहरातील एका नामांकित संस्थेत क्रीडा शिक्षक म्हणून कार्यरत आहे. क्रीडा क्षेत्रात त्याची आदर्श शिक्षक म्हणून ओळख असून, राज्य शासनाने त्याला विविध पुरस्कारांनी गौरविले आहे. अशा पार्श्वभूमीच्या व्यक्तीचे नाव एमपीएससी परीक्षेतील पेपरफुटी प्रकरणात समोर आल्याने या प्रकरणाकडे लक्ष वेधले गेले आहे. औषध निरीक्षक पदासाठी झालेल्या परीक्षेतील प्रश्न आधीच मिळाल्याचा आरोप आणि त्यासाठी झालेल्या आर्थिक व्यवहाराचा तपास या प्रकरणात महत्त्वाचा ठरत आहे. मयूरला न्यायालयाने 17 ऑक्टोबरपर्यंत पोलीस कोठडी सुनावली असून, या काळात पोलिसांकडून त्याची चौकशी केली जाणार आहे. या चौकशीतून प्रकरणातील इतर संशयित आणि प्रश्न मिळवण्याच्या प्रक्रियेबाबत काय माहिती समोर येते, याकडे लक्ष लागले आहे.