'पिट्याभाई'चा पण भाजपात प्रवेश, राज ठाकरेंनी झापलेलं... मनसे 'पॅटर्न' सोडून 'कमळ' हाती!

भाजपमध्ये प्रवेश करताना परदेशींनी 'संघाचे संस्कार' आणि मराठी चित्रपटसृष्टीला न्याय देण्याचे कारण सांगितले. हा निर्णय मनसेसाठी आगामी स्थानिक स्वराज्य संस्था निवडणुकीपूर्वी मोठा धक्का मानला जात आहे. 

'पिट्याभाई'ला राज ठाकरेंनी झापलेलं..

काही दिवसांपूर्वी, पुण्यात मनसे अध्यक्ष राज ठाकरेंनी शाखाध्यक्षांसोबत पदाधिकारी आढावा बैठक घेतली होती. या बैठकीत आगामी निवडणुकांमध्ये कामात दिरंगाई करणाऱ्या पदाधिकाऱ्यांवर राज ठाकरेंनी संताप व्यक्त केलेला. याचवेळी रमेश परदेशी यांच्यावरही त्यांनी राग व्यक्त केला होता. परदेशी यांनी काही दिवसांपूर्वी सोशल मीडियावर राष्ट्रीय स्वयंसेवक संघाच्या (RSS) पथसंचालनातील फोटो पोस्ट केले होते, ज्यात ते संघाच्या गणवेशात दिसत होते. यावरून राज ठाकरेंनी त्यांना थेट विचारणा केलेली , "तू छातीठोकपणे सांगतोस, मी संघाचा कार्यकर्ता आहे, तर मग इथे कशाला टाईमपास करायला आलास? एकाच ठिकाणी कुठे तरी राहा," 

राज ठाकरेंच्या या आक्रमक बाण्यामुळे बैठकीतील सर्वच जण अवाक् झाले होते. यामुळे रमेश परदेशी हे देखील नाराज झाले होते. पण आपली नाराजी लपवत परदेशींनी तात्काळ खुलासा देताना म्हटलेलं की, "राज साहेबांनी मला असं काही म्हटलं नाही. मी तुम्हाला सर्व अॅक्ट करून दाखवलं. माझी कोणतीही राजकीय महत्वाकांक्षा नाही. हा अंतर्गत आणि गोपनीय विषय आहे. ज्यांनी हे बाहेर काढलं, ते पक्षाचे शत्रू आहेत." 

अखेर भाजपमध्ये प्रवेश 

दरम्यान, या गोष्टीला काही दिवस उलटत नाही तोच मुंबईत झालेल्या सोहळ्यात रमेश परदेशी यांनी भाजपमध्ये प्रवेश केला. यावेळी भाजपा प्रदेशाध्यक्ष रवींद्र चव्हाण, केंद्रीय मंत्री मुरलीधर मोहोळ आणि कोथरुडचे आमदार चंद्रकांत पाटील उपस्थित होते. परदेशी यांनी भाजपचा झेंडा हाती घेत 'जय महाराष्ट्र' म्हणत मनसेला रामराम ठोकला.

मनसेसाठी धक्का: निवडणुकीपूर्वी बडा नेता भाजपच्या गळाला

मनसेसाठी हा निर्णय आगामी स्थानिक स्वराज्य संस्था निवडणुकीपूर्वी सर्वात मोठा धक्का ठरला आहे. परदेशी हे मनसे चित्रपट सेनेचे उपाध्यक्ष आणि पुण्यातील शाखा अध्यक्ष होते. त्यांच्या नेतृत्वाखाली चित्रपट सेनेने मराठी चित्रपटसृष्टीत पक्षाची ताकद वाढवली होती. राज ठाकरेंनी नुकत्याच घेतलेल्या बैठकीत पदाधिकाऱ्यांना धार देण्याचा प्रयत्न केला असताना, असा बडा नेते गमावणे मनसेसाठी निश्चितपणे मोठे नुकसान आहे. 

रमेश परदेशी हे 'मुळशी पॅटर्न' चित्रपटातील पिट्याभाई या भूमिकेमुळे लोकप्रिय झाले. त्यांच्या या राजकीय निर्णयाचा मनसेला पुण्यात बराच फटका बसू शकतो. त्यामुळे पुढील काळात परदेशी यांची नेमकी काय भूमिका असणार हे पाहणं महत्त्वाचं असणार आहे.