डोंबिवलीतील तरुण मित्रांसोबत इर्शाळवाडी ट्रेकला गेला, पण घरी डेथ बॉडी परतली, काय घडलं?

ट्रेकदरम्यान प्रकृती बिघडली; ग्रामस्थांच्या मदतीने झोळीतून आणले 

सोमवारी डोंबिवलीतील सहा मित्रांचा ग्रुप ट्रेकिंगच्या उद्देशाने इर्शाळवाडी येथे पोहोचला होता. यामध्ये साहिल सुर्वे, युवराज चव्हाण, मितेश गुप्ता, देवेश गुप्ता, क्रिश शेट्टी आणि रितेश कोणका यांचा समावेश होता. ट्रेक चढत असताना अचानक रितेशला अस्वस्थ वाटू लागले आणि त्याची प्रकृती खालावली. त्याच्या मित्रांनी त्याला पाणी देऊन सावरण्याचा आणि धीर देण्याचा प्रयत्न केला, मात्र काही वेळातच तो बेशुद्ध पडला. परिस्थितीचे गांभीर्य ओळखून दोन मित्रांनी तातडीने पायथ्याला धाव घेतली आणि स्थानिक ग्रामस्थांना मदतीसाठी बोलावले. दुर्गम भाग असल्याने ग्रामस्थांनी मोठ्या कष्टाने पारंपारिक झोळी तयार करून रितेशला डोंगरावरून खाली आणले, मात्र दुर्दैवाने डोंगरावरून खाली येण्यापूर्वीच त्याचा श्वास थांबला होता.

हेही वाचा : सासरच्यांनी केला जीन्स घालायला विरोध, शेवटी सुनेनं केलं नको ते

उष्माघात की हृदयविकाराचा झटका? शवविच्छेदन अहवालाकडे सर्वांचे लक्ष

रितेशच्या अचानक झालेल्या निधनाचे नेमके कारण अद्याप स्पष्ट झालेले नाही, मात्र प्राथमिक अंदाजानुसार कडाक्याची उष्णता किंवा हृदयविकाराच्या झटक्यामुळे ही घटना घडली असावी असे बोलले जात आहे. वाढत्या तापमानामुळे ट्रेकिंगसारख्या शारीरिक श्रमाच्या कामात उष्माघाताचा धोका संभवतो, असा प्राथमिक तर्क वर्तवण्यात आला आहे. तरीही, मृत्यूचे नेमके आणि अधिकृत कारण शवविच्छेदन अहवाल प्राप्त झाल्यानंतरच समोर येईल. पोलीस आणि वैद्यकीय अधिकारी या संदर्भात अधिक तपास करत असून रितेशच्या निधनाने त्याच्या मित्रांना मोठा धक्का बसला आहे.

ट्रेकिंगमधील सुरक्षेचा प्रश्न पुन्हा ऐरणीवर; सह्याद्रीत शोककळा

इर्शाळवाडीसारख्या दुर्गम आणि आव्हानात्मक ठिकाणी घडलेल्या या घटनेमुळे ट्रेकिंगमधील सुरक्षेचा आणि आरोग्याचा प्रश्न पुन्हा एकदा ऐरणीवर आला आहे. विशेषतः उन्हाळ्याच्या दिवसांत डोंगराळ भागात ट्रेकिंग करताना शारीरिक क्षमतेचा विचार करणे किती आवश्यक आहे, हे या घटनेवरून अधोरेखित झाले आहे. रितेशच्या मित्रांनी त्याला वाचवण्यासाठी शर्थीचे प्रयत्न केले आणि स्थानिक ग्रामस्थांनीही मोलाची मदत केली, परंतु निसर्गाच्या कोपापुढे त्यांचे प्रयत्न अपुरे पडले. तरुण वयात रितेशचा असा अंत झाल्याने त्याच्या कुटुंबावर दुःखाचा डोंगर कोसळला असून, या घटनेने गड-किल्ल्यांवर जाणाऱ्या पर्यटकांना सावधगिरीचा इशारा दिला आहे.

इतर महत्त्वाच्या बातम्या 

कल्याण : भोंदूबाबाने आईला बाहेर पाठवलं, अन् मुलीला तोकड्या कपड्यात बसवून...