भारताचे ऑईल टँकर हॉर्मुझच्या सामुद्रधुनीतून आणण्यास इराणची परवानगी, एस जयशंकर यांच्या 'फोनाफोनी'ने निघाला मार्ग

हेही वाचा : डॉक्टरांनी महिलेला 'ब्रेन डेड' घोषित केलं, व्हेंटिलेटर काढलं; अंत्यसंस्काराची तयारी अन् रुग्णवाहिकेतून नेताना जागी झाली

ही राजकीय चर्चा प्रामुख्याने भारताचा इंधन पुरवठा विनाव्यत्यय सुरू ठेवण्यासाठी करण्यात आली होती. इराणच्या IRGC ने यापूर्वी हा सागरी मार्ग बंद करण्याची घोषणा केली होती आणि कोणत्याही जहाजावर कारवाई करण्याचा इशारा दिला होता. मात्र, एस. जयशंकर यांनी रशियाचे परराष्ट्र मंत्री Sergey Lavrov  आणि फ्रान्सचे परराष्ट्र मंत्री Jean-Nol Barrot  यांच्याशीही संवाद साधून या प्रदेशातील स्थिरता राखण्याबाबत चर्चा केली होती. या  राजकीय प्रयत्नांमुळेच भारताला या युद्धसदृश परिस्थितीत सुरक्षित कॉरिडॉर मिळवण्यात यश आले असून, यामुळे कच्च्या तेलाची आणि एलपीजीची (LPG) आयात सुरळीत राहण्यास मदत होणार आहे.

देशांतर्गत एलपीजी टंचाई आणि वाढत्या किमती; पंतप्रधान मोदींनी दिल्या सूचना

दुसरीकडे, पश्चिम आशियातील या संघर्षाचा परिणाम भारताच्या देशांतर्गत बाजारपेठेवर जाणवू लागला आहे. व्यापारी वापराच्या एलपीजी सिलिंडरचा तुटवडा निर्माण झाल्याने मुंबई, बेंगळुरू आणि चेन्नईसारख्या मोठ्या शहरांमधील हॉटेल व्यवसाय संकटात सापडला आहे. मुंबईतील जवळपास 20 टक्के हॉटेल्स बंद झाल्याची माहिती समोर येत असून, व्यावसायिक सिलिंडरचा काळाबाजारही वाढला आहे. अनेक ठिकाणी एका सिलिंडरसाठी 2,000 ते 2,500 रुपये मोजावे लागत आहेत. 7 मार्च रोजीच घरगुती सिलिंडरच्या दरात 60 रुपयांची, तर व्यावसायिक सिलिंडरच्या दरात 115 रुपयांची वाढ झाल्याने सर्वसामान्यांच्या खिशाला मोठी कात्री लागली आहे.

या गंभीर परिस्थितीची दखल घेत पंतप्रधान नरेंद्र मोदी यांनी केंद्रीय मंत्रिमंडळाच्या बैठकीत मंत्र्यांना विशेष सूचना दिल्या आहेत. एलपीजी पुरवठ्याबाबत पसरवल्या जाणाऱ्या अफवांना आणि चुकीच्या माहितीला चोख प्रत्युत्तर देण्याचे आदेश त्यांनी दिले आहेत. हा पेचप्रसंग जागतिक घडामोडींमुळे निर्माण झाला असून केवळ भारतापुरता मर्यादित नाही, असे स्पष्ट करत पंतप्रधानांनी विरोधकांच्या नरेटिव्हला खोडून काढण्याचे आवाहन केले आहे. इराणकडून मिळालेल्या दिलासादायक बातमीमुळे आता लवकरच पुरवठा साखळी पूर्वपदावर येईल आणि वाढत्या किमतींवर नियंत्रण मिळवणे सरकारला शक्य होईल, अशी अपेक्षा व्यक्त केली जात आहे.

इतर महत्त्वाच्या बातम्या 

वहिणी 'नाही' म्हटल्याने सलून चालकाने केले कांड, वहिणीसह चिमुकल्या पुतणींवर फेकले ॲसिड; पोलिसांनाही दिला गुंगारा