मुंबई : पोलीस असलेल्या पतीकडून मारहाण अन् सासरी छळ; गरोदर नवविवाहितेने गळ्याला दोर लावला

पोलीस असलेल्या पतीकडून मारहाण अन् सासरी छळ

मिळालेल्या माहितीनुसार, प्रभू चाटे (वय 27, रा. लक्ष्मी पार्क, मीरा रोड) हा मीरा रोड पोलिस ठाण्यात पोलिस शिपाई म्हणून कार्यरत आहे. एप्रिल महिन्यात, 29 एप्रिल 2025 रोजी त्याचा विवाह पुण्यातील कात्रज येथील 19 वर्षीय स्वाती डोंगरे हिच्याशी झाला होता. विवाहानंतर काही दिवसातच स्वातीवर पतीसह सासरच्या मंडळींकडून विविध कारणांवरून अत्याचार सुरू झाल्याचे तक्रारीत नमूद आहे. सततची मारहाण, अपमानास्पद वागणूक आणि घरगुती छळ यामुळे स्वाती मानसिक तणावाखाली होती.

गरोदर नवविवाहितेने गळ्याला दोर लावला 

स्वाती गर्भवती असल्याचेही समोर आले आहे. अशा परिस्थितीत तिच्यावर वाढत्या छळामुळे परिस्थिती हाताबाहेर गेली आणि 27 नोव्हेंबर रोजी तिने घरी गळफास घेऊन आत्महत्या केली. घटना घडताच कुटुंबीयांनी धाव घेतली. मात्र, तोपर्यंत उशीर झाला होता. या घटनेने परिसरात शोककळा पसरली असून पोलिस दलातील एका कर्मचाऱ्याने पत्नीवर छळ केल्याचा आरोप लागल्याने पोलिस यंत्रणेतही खळबळ माजली आहे.

हेही वाचा : अजित पवारांच्या राष्ट्रवादीने उमेदवारी दिलेल्या 25 वर्षीय महिलेचा मृत्यू, प्रचाराला जात असताना काय घडलं?

या प्रकरणी स्वातीची आई दुर्गा डोंगरे यांनी मीरा रोड पोलिस ठाण्यात फिर्याद नोंदवली. त्यांच्या तक्रारीवरून पती प्रभू चाटे याला पोलिसांनी अटक केली असून त्याच्यासह त्याचे आई-वडील आणि बहिणीवरही गुन्हा दाखल करण्यात आला आहे. कुटुंबीयांवर घरगुती हिंसा, मारहाण आणि आत्महत्येस प्रवृत्त केल्याचे आरोप ठेवण्यात आले आहेत.

या प्रकरणाचा पुढील तपास सुरू असून स्वातीला सहन करावा लागलेला छळ, पतीचे वागणे आणि आत्महत्यामागील सर्व कारणांचा तपास पोलिसांकडून करण्यात येत आहे. एकीकडे समाजात महिलांवरील अत्याचारांच्या घटनांमध्ये वाढ होत असल्याचे चित्र दिसत आहे, तर दुसरीकडे पोलिस खात्यातील कर्मचारीच अशा प्रकरणात आरोपी ठरत असल्याने अनेक प्रश्न निर्माण झाले आहेत. या हृदयद्रावक घटनेमुळे परिसरात संतापाची लाट पसरली असून स्वातीसाठी न्याय मिळावा, अशा मागण्या नागरिकांकडून केल्या जात आहेत.

इतर महत्त्वाच्या बातम्या 

विधानसभेला आतून पाठिंबा देण्यासाठी रामभाऊ 35 कोटी देतो म्हणाला, फडणवीसांकडे घेऊन गेला : जयसिंह मोहिते पाटील