बॅरिकेट्समध्ये आढळली बाईक

मिळालेल्या माहितीनुसार, आंबेनळी घाटातील एका अतिधोकादायक वळणावर स्प्लेंडर बाईक बॅरिकेट्समध्ये अडकलेल्या अवस्थेत आढळून आली. या घटनेवरून बाईकवरील प्रवासी दरीत कोसळल्याचा अंदाज व्यक्त करण्यात आला. यानंतर तात्काळ प्रतापगड रेस्क्यू टीम आणि महाबळेश्वर ट्रेकर्सचे सदस्य घटनास्थळी दाखल झाले आणि युद्धपातळीवर शोधमोहीम सुरू करण्यात आली. शोधकार्यादरम्यान सुमारे 700 फूट खोल दरीत संबंधित दांपत्याचा मृत अवस्थेत शोध लागला. मृतांची ओळख मोहन चव्हाण (वय 55) आणि जयश्री चव्हाण (वय 48, रा. सोनगिरवाडी) अशी झाली आहे. या दुर्घटनेमुळे त्यांच्या कुटुंबावर दुःखाचा डोंगर कोसळला असून स्थानिक स्तरावर शोककळा पसरली आहे. 

हे ही वाचा : समजून घ्या: विधान परिषद निवडणूक कोटा कसा ठरतो? ठाकरेंना किती मतं लागणार?

आव्हानांचा सामना करत मृतदेह काढले

दरम्यान, घटनास्थळी अवकाळी पाऊस आणि दाट धुके यामुळे बचावकार्य अत्यंत कठीण बनले आहे. निसरड्या उतारांमुळे आणि कमी दृश्यमानतेमुळे रेस्क्यू टीमला मोठ्या आव्हानांचा सामना करावा लागत आहे. प्रतापगड रेस्क्यू टीम आणि महाबळेश्वर ट्रेकर्सचे जवान जीव धोक्यात घालून मृतदेह बाहेर काढण्याचे प्रयत्न करत आहेत. या घटनेत पोलादपूर पोलीस आणि महाबळेश्वर पोलीस यंत्रणेनेही तात्काळ घटनास्थळी धाव घेत मदतकार्याला हातभार लावला आहे. स्थानिक प्रशासन, पोलीस आणि स्वयंसेवी संस्थांच्या समन्वयातून संपूर्ण परिस्थितीवर बारकाईने लक्ष ठेवण्यात येत आहे.

हे ही वाचा : विधान परिषद निवडणूक: केशव उपाध्येंना लागणार आमदारकीची लॉटरी?, महाराष्ट्रातून भाजप हायकमांडकडे पाठवली 'ही' नावं

घाताटून प्रवास करताना सतर्कता बाळगावी

आंबेनळी घाट हा अत्यंत धोकादायक वळणांचा आणि खोल दऱ्यांचा घाट म्हणून ओळखला जातो. विशेषतः पावसाळ्यात रस्ता घसरडा होत असल्याने अपघातांची शक्यता अधिक वाढते. त्यामुळे वाहनचालकांनी या मार्गावरून प्रवास करताना वेग मर्यादित ठेवावा, सतर्कता बाळगावी आणि नियमांचे काटेकोर पालन करावे, असे आवाहन प्रशासनाकडून करण्यात आले आहे. घटनेची नोंद संबंधित पोलिस ठाण्यात करण्यात आली असून पुढील तपास सुरू आहे.