सोलापूर : अनैतिक संबंधाचा संशय, पाळत ठेवली अन् शेवटी वळसंग येथील ड्रायव्हरला शेजाऱ्याने क्रूरपणे संपवलं

बुधवारी सायंकाळी सुमारे पाच वाजण्याच्या सुमारास वळसंग येथे आठवडा बाजार भरला असताना ही घटना घडली. मिळालेल्या माहितीनुसार, लक्ष्मण वाघमारे याचे अनैतिक संबंध असल्याचा संशय गावातीलच रविकुमार भीमाशंकर पुटके याला होता. या संशयामुळे आरोपी अनेक दिवसांपासून लक्ष्मणवर पाळत ठेवून होता. बाजाराच्या दिवशी दुपारपासूनच आरोपी त्याच्या मागावर होता, अशी माहिती प्राथमिक तपासात समोर आली आहे.

सायंकाळच्या सुमारास बाजारातील सिद्धेश्वर चौक परिसरात लक्ष्मण वाघमारे याला एकटं गाठत आरोपीने अचानक हल्ला चढवला. जवळ बाळगलेल्या कोयत्याने त्याच्यावर सपासप वार करण्यात आले. एवढ्यावरच न थांबता, खाली कोसळलेल्या लक्ष्मणच्या डोक्यात मोठा दगड घालून त्याची निर्दयपणे हत्या करण्यात आली. हल्ल्याची तीव्रता इतकी होती की मृताच्या चेहऱ्यावर आणि पोटावर गंभीर जखमा आढळून आल्या आहेत.

घटनेनंतर परिसरात एकच गोंधळ उडाला. रक्ताच्या थारोळ्यात पडलेल्या लक्ष्मण वाघमारे यांना तातडीने सोलापूर येथील शासकीय रुग्णालयात, सिव्हिल हॉस्पिटलमध्ये दाखल करण्यात आलं. मात्र, डॉक्टरांनी तपासणीअंती त्यांना मृत घोषित केलं. मृत्यूची बातमी समजताच सिव्हिल हॉस्पिटलमध्ये मित्र, नातेवाईक आणि गावकऱ्यांनी मोठी गर्दी केली होती. कुटुंबीयांचा आक्रोश पाहून उपस्थितांचे डोळे पाणावले.

प्राथमिक तपासात हा खून शेजारी राहणाऱ्या रविकुमार भीमाशंकर पुटके याने केल्याचं स्पष्ट होत आहे. अनैतिक संबंधाच्या संशयातूनच हा खून केल्याची शक्यता पोलिसांनी व्यक्त केली आहे. आरोपीने पूर्वनियोजित कट रचूनच ही हत्या केल्याचा संशयही तपास यंत्रणांकडून व्यक्त करण्यात येत आहे.

या घटनेमुळे शांत असलेल्या वळसंग गावात मोठी खळबळ उडाली असून नागरिकांमध्ये भीतीचं वातावरण निर्माण झालं आहे. पोलिसांनी घटनास्थळी पंचनामा केला असून आरोपीचा शोध घेण्यास आणि पुढील कारवाईस सुरुवात केली आहे. या प्रकरणाचा अधिक तपास सुरू असून, खुनामागील नेमकी पार्श्वभूमी आणि इतर संभाव्य बाबींचा शोध पोलीस घेत आहेत.

इतर महत्त्वाच्या बातम्या 

सातारा : हॉटेलमध्ये थर्टी फर्स्टची पार्टी, बाहेर येताच तरुणाने अंधाऱ्या वाटेत पाय टाकला, थेट 400 फुट खोल दरीत कोसळला