'पोलीस' लिहिलेल्या कारमधून शिक्षकाने केलं व्यापाऱ्याचं अपहरण, पुढे काय घडलं?

हेही वाचा : घड्याळ दुरुस्तीच्या दुकानातून चालवल्या जाणाऱ्या पक्षाला अब्जावधींची देणगी

कारमधून अपहरण केल्याची माहिती

६ सप्टेंबरच्या रात्री सुमारे १०.३० ते १०.४५ वाजण्याच्या सुमारास सिपरी बाजार पोलिसांना UP-112 च्या माध्यमातून विकास गुप्ता यांचे काही लोकांनी कारमधून अपहरण केल्याची माहिती मिळाली. माहिती मिळताच सिपरी बाजार पोलिसांनी SWAT टीमच्या मदतीने संबंधित वाहनाचा शोध सुरू केला आणि त्याचा पाठलाग केला. जवळपास सात तासांच्या प्रयत्नांनंतर पोलिसांनी कार शोधून काढली. त्यानंतर विकास गुप्ता यांची सुखरूप सुटका करण्यात आली आणि रवि यादव व विनय यादव या दोघांना अटक करण्यात आली. पोलिसांच्या माहितीनुसार, रवी यादव हा सरकारी शिक्षक आहे. त्याचे वडील रघुराज सिंह हे उत्तर प्रदेश पोलिसांमध्ये निरीक्षक असून महोबा जिल्ह्यात त्यांची नियुक्ती आहे.

हेही वाचा : ‘ऑपरेशन टायगर’च्या दिशेने शिंदेसेनेची वाटचाल; ठाकरेंच्या 16 नगरसेवकांवर टांगती तलवार

आरोपींनी जबरदस्तीने कारमध्ये बसवून तेथून नेल्याचा आरोप

पोलिसांनी सांगितले की, अपहरणासाठी वापरण्यात आलेल्या कारवर “Police” असे लिहिलेले आहे. ही कार हरेंद्र नावाच्या व्यक्तीच्या नावावर नोंदणीकृत असून तो कथितपणे कॉन्स्टेबल आणि आरोपींचा सहकारी आहे. हरेंद्र सध्या पोलिस विभागात किंवा अन्य कोणत्याही सरकारी विभागात कार्यरत आहे का, याची पडताळणी पोलिसांकडून केली जात आहे. चौकशीदरम्यान आरोपींनी आपण मद्यपान केले असल्याचे आणि विकास गुप्ता यांच्यासोबत किरकोळ वाद झाल्यानंतर हा प्रकार घडल्याचे पोलिसांना सांगितल्याचे समोर आले आहे. आरोपींनी गुप्ता यांना जबरदस्तीने कारमध्ये बसवून तेथून नेल्याचा आरोप आहे. झाशी शहराच्या पोलीस अधीक्षक प्रीती सिंह यांनी सांगितले की, गुप्ता कारमधून घटनास्थळी आले होते. त्यावेळी आरोपी तेथे आधीपासून उपस्थित होते. काही वेळापूर्वी घडलेल्या घटनेबाबत विचारण्यासाठी गुप्ता त्यांच्याकडे गेले होते. त्यानंतर वाद वाढला आणि आरोपींनी त्यांना जबरदस्तीने कारमध्ये बसवून पळ काढला.

विकास गुप्ता यांनी सांगितले की, ते रात्री उशिरा एलिट परिसरातून परतत होते. अतल चौकातून वळताना त्यांना अपघात झाल्यासारखे दिसणारे एक वाहन दिसले. आपल्या ओळखीच्या व्यक्तीचा अपघात झाला असावा, या भीतीने त्यांनी गाडी थांबवली. घटनास्थळी UP-112 चे वाहनही उपस्थित होते. गुप्ता यांनी कारमधील व्यक्तींना काय झाले, अशी विचारणा केली असता त्यांनी कथितपणे शिवीगाळ करण्यास सुरुवात केली. गुप्ता यांनी आपल्या भावाला फोन करून वादाबाबत माहिती दिली. मात्र त्यांना काही समजण्यापूर्वीच आरोपींनी जबरदस्तीने कारमध्ये बसवून मारहाण केल्याचा आरोप त्यांनी केला. सुमारे दीड तास आपल्याला मारहाण करण्यात आल्याचे गुप्ता यांनी सांगितले. त्यांचा भाऊ घटनास्थळी पोहोचल्यानंतर त्याने पोलिसांना माहिती दिली आणि त्यानंतर पोलिसांनी तातडीने कारवाई करत गुप्ता यांची सुटका केली. दोन्ही आरोपींना ताब्यात घेऊन तुरुंगात पाठवण्यात आले असून वाहनाच्या मालकीसह नोंदणीकृत मालकाच्या कथित सहभागाचा तपास सुरू आहे.