मला मुलगाच हवाय, क्रूर बापाने गरोदर बायको अन् दोन मुलींना स्विमिंग पूलमध्ये बुडवून मारलं

हनमकोंडा येथील तिहेरी हत्याकांड आणि क्रूर कारस्थान

या भीषण हत्याकांडामागील कारस्थान अत्यंत नियोजनबद्ध पद्धतीने रचल्याचे तपासात निष्पन्न झाले आहे. अजहरुद्दीनने यापूर्वी आपल्या पत्नीवर गर्भपात करण्यासाठी वारंवार दबाव टाकला होता, परंतु त्याच्या पत्नीने या अन्यायकारक मागणीला कडाडून विरोध दर्शवला होता. पत्नीने गर्भपात करण्यास नकार दिल्यानंतर अजहरुद्दीनने या क्रूर कृत्याची योजना आखली. याच योजनेचा भाग म्हणून तो आपल्या कुटुंबाला घेऊन एका स्विमिंग पूलवर गेला आणि तिथे त्याने आपल्या पत्नीसह दोन्ही मुलींना पाण्यात फेकून दिले. या घटनेनंतर आरोपी पसार झाला असून, त्याला पकडण्यासाठी पोलिसांनी विशेष पथके तयार केली आहेत. कौटुंबिक वादातून आणि लिंगभेदाच्या विकृत मानसिकतेतून एका हसत्याखेळत्या कुटुंबाचा असा दुर्दैवी अंत झाल्याने समाजमनातून तीव्र संताप व्यक्त केला जात आहे.

लग्नाला नकार दिल्याने तरुणीला एचआयव्ही बाधित रक्त टोचले

तेलंगणातीलच मेडचल-मलकाजगिरी जिल्ह्यातून आणखी एक संतापजनक घटना समोर आली आहे, जिथे एका माथेफिरू तरुणाने सूडबुद्धीने एका तरुणीच्या आयुष्याशी खेळ केला. कोलीपाका मनोहर या 25 वर्षीय युवकाला पोलिसांनी एका तरुणीच्या शरीरात जबरदस्तीने स्वतःचे एचआयव्ही (HIV) पॉझिटिव्ह रक्त टोचल्याच्या आरोपाखाली अटक केली आहे. आरोपी मनोहरचे या तरुणीवर प्रेम होते आणि त्याला तिच्याशी लग्न करायचे होते, मात्र तरुणीने त्याच्या लग्नाचा प्रस्ताव धुडकावून लावला होता. या नकाराचा बदला घेण्यासाठी मनोहरने अत्यंत घृणास्पद कृत्य करण्याचे ठरवले. शुक्रवारी त्याने थेट तरुणीच्या घरात घुसून तिला जीवे मारण्याच्या उद्देशाने आपल्या शरीरातील दूषित रक्त सिरिंजच्या साहाय्याने तिच्या शरीरात टोचले.

या गंभीर घटनेनंतर पीडितेचे वडील चिरंजीवी यांनी पोचारम पोलीस ठाण्यात धाव घेऊन तक्रार दाखल केली. पोलिसांनी तातडीने कारवाई करत मनोहरला अन्नोजिगुडा येथील NTPC X रोडवरून बेड्या ठोकल्या आहेत. एका खासगी कंपनीत काम करणाऱ्या मनोहरवर भारतीय न्याय संहिता (BNS) च्या कलम 109 अंतर्गत हत्येचा प्रयत्न केल्याचा गुन्हा दाखल करण्यात आला असून, त्याला सध्या न्यायालयीन कोठडीत पाठवण्यात आले आहे. ही घटना समाजातील वाढत्या विकृत मानसिकतेचे आणि सुडबुद्धीचे हिंसक दर्शन घडवणारी आहे. पोलीस आता या दोन्ही घटनांचा सखोल तपास करून आरोपींना कठोरात कठोर शिक्षा मिळवून देण्यासाठी प्रयत्न करत आहेत. या दोन्ही प्रकरणांमुळे तेलंगणा राज्यासह संपूर्ण देशात खळबळ उडाली असून महिलांच्या सुरक्षेचा प्रश्न पुन्हा एकदा ऐरणीवर आला आहे.

इतर महत्त्वाच्या बातम्या 

मुंबईची खबर : लोकलमधील गर्दीपासून मुंबईकरांना दिलासा, रेल्वे प्रशासनाने घेतला महत्त्वाचा निर्णय; जाणून घ्या सविस्तर