पत्नी अन् आईचं डोकं वीटेने ठेचून खून केला, अन् सिकंदर गुप्ता दोघींचं मांस खात होता.. ; पोलिसांना भयंकर दृश्य दिसलं

मिळालेल्या माहितीनुसार, 12 जानेवारी रोजी सकाळच्या सुमारास सिकंदर गुप्ता आपल्या 60 वर्षीय आई रूना देवी आणि पत्नी प्रियंका यांच्यासोबत घराच्या छतावर शेकटी पेटवून ऊब घेत बसला होता. यावेळी सिकंदर दारूच्या नशेत असल्याचं सांगितलं जात आहे. याच दरम्यान पती-पत्नीमध्ये कोणत्या तरी कारणावरून वाद झाला. हा वाद काही वेळातच टोकाला गेला. यावेळी रागाच्या भरात सिकंदरने जवळच असलेला दगड उचलून पत्नी प्रियांकाच्या डोक्यावर जोरदार घाव घातला. या हल्ल्यात प्रियंका गंभीर जखमी झाली. हा प्रकार पाहून आई रूना देवी घाबरल्या आणि त्यांनी मुलाला थांबवण्याचा प्रयत्न केला. मात्र, संतापलेल्या सिकंदरने आईलाही सोडलं नाही. त्याने त्याच दगडाने आईच्या डोक्यावरही वार केला. इतक्यावरच सिकंदर थांबला नाही. तो दोघींच्या डोक्यावर दगडाने घाव घालत राहिला. काही वेळात दोघींचाही मृत्यू झाला आणि त्या रक्ताच्या थारोळ्यात पडलेल्या पाहायला मिळाल्या.

हेही वाचा : नाशिक : आपच्या उमेदवारावर विरोधी कार्यकर्त्याने बंदूक उगारली, पण स्थानिकांनी त्यालाच दिला चोप, पाहा व्हिडीओ

घटनेदरम्यान मोठा गोंधळ आणि आरडाओरड झाली. शेजाऱ्यांना संशय येताच त्यांनी तात्काळ पोलिसांना माहिती दिली. मात्र, पोलिस घटनास्थळी पोहोचताच सिकंदर अधिकच आक्रमक झाला. त्याने छतावरून पोलिसांवर दगडफेक केली. मोठ्या प्रयत्नांनंतर पोलिसांनी छतावर जाऊन त्याला ताब्यात घेतलं. त्यावेळी सिकंदरच्या हातांवर रक्त पडलेलं होतं. पोलिसांनी सांगितलं की, छतावर दोन्ही महिलांचे मृतदेह विद्रूप अवस्थेत पडले होते. काही प्रत्यक्षदर्शींनी आरोपी मृतांचं मांस इथे-तिथे फेकत असल्याचंही सांगितलं.

अटक केल्यानंतर मेडिकल तपासणीसाठी सिकंदरला रुग्णालयात नेण्यात आलं. तेथेही त्याने असभ्य वर्तन केलं. त्याने डॉक्टरांच्या तोंडावर थुंकल्याचं सांगितलं जात आहे. धक्कादायक बाब म्हणजे, थुंकताना त्याच्या तोंडातून रक्तासह मांसाचा तुकडाही बाहेर पडल्याचं सूत्रांनी सांगितलं. त्यामुळे हत्या केल्यानंतर मृतांचं मांस खाल्ल्याचीही भीती व्यक्त केली जात आहे.

पोलिसांनी दिलेल्या माहितीनुसार, आरोपीची मानसिक अवस्था संशयास्पद वाटत होती. मात्र, वैद्यकीय तपासणीत तो नॉर्मल असल्याचं समोर आलं. सिकंदर आणि प्रियंका यांच्या लग्नाला काही वर्षे झाली होती, मात्र त्यांना अपत्य नव्हतं. याच कारणामुळे सिकंदर मानसिक तणावात होता आणि तो मोठ्या प्रमाणात दारू पित असल्याचंही पोलिसांनी सांगितलं. कुशीनगरचे अपर पोलीस अधीक्षक सिद्धार्थ वर्मा यांनी सांगितलं की, दोन्ही मृतदेहांचं पोस्टमॉर्टम करण्यात आलं असून आरोपी सिकंदर गुप्ताला अटक करून न्यायालयीन कोठडीत पाठवण्यात आलं आहे. या प्रकरणाचा पुढील तपास सुरू असून कायदेशीर कारवाई केली जात असल्याचं त्यांनी स्पष्ट केलं.

इतर महत्त्वाच्या बातम्या

ज्योतिषशास्त्रानुसार, काही राशीतील लोकांचे भविष्य उजळणार, तर 'या' राशींतील लोकांना सावध राहावं लागणार