जिच्यावर विश्वास ठेवला, तिनेच पाठीत खंजीर खुपसला; मोलकरणीने मालकीणीला का संपवलं?

15 वर्षांचा जुना संबंध आणि पैशांचा हव्यास

मिळालेल्या माहितीनुसार, आरोपी रेखा राठोड ही गेल्या 15 वर्षांपासून शांतीबेन यांच्या कुटुंबाच्या संपर्कात होती. ती केवळ त्यांच्या घरची कामेच करत नव्हती, तर स्वयंपाकाची जबाबदारीही सांभाळत असे, ज्यामुळे कुटुंबाचा तिच्यावर आंधळा विश्वास होता. रेखा हनुमान टेकरी परिसरात फर्निचरचा व्यवसाय देखील करत होती. साधारण 1 वर्षापूर्वी शांतीबेन यांनी अडचणीच्या काळात रेखाला मदतीचा हात म्हणून आपले सोन्या-चांदीचे दागिने आणि काही रोकड दिली होती. मात्र, जेव्हा शांतीबेन यांनी आपली ही ठेव परत मागण्यास सुरुवात केली, तेव्हा रेखावर दबाव वाढू लागला. दिलेले दागिने परत करण्याऐवजी त्यांचा कायमचा काटा काढण्याचे क्रूर नियोजन रेखाने आपल्या साथीदारांच्या मदतीने केले.

हेही वाचा : पत्नीचा मर्डर केल्याने वडील तुरुंगात; ज्याच्याकडे आश्रयासाठी गेली त्या मामानेच केला भाचीवर बलात्कार

निर्घृण हत्या आणि पुराव्यांची विल्हेवाट

22 March च्या रात्री साधारण 8 वाजता शांतीबेन रेखाच्या फर्निचरच्या दुकानात पोहोचल्या होत्या. तिथे त्यांच्यावर काय संकट ओढवणार आहे याची त्यांना पुसटशी कल्पनाही नव्हती. शांतीबेन दुकानात येताच रेखा राठोड आणि तिच्या 3 साथीदारांनी मिळून त्यांच्यावर प्राणघातक हल्ला केला. हा हल्ला इतका भीषण होता की शांतीबेन यांचा जागीच मृत्यू झाला. आपला गुन्हा लपवण्यासाठी आणि पोलिसांपासून वाचण्यासाठी आरोपींनी अत्यंत थंड डोक्याने शांतीबेन यांचा मृतदेह एका गोणीत भरला आणि तो एका निर्जन भागातील नाल्यात फेकून दिला. या घटनेनंतर शांतीबेन बेपत्ता असल्याची तक्रार दाखल होताच पोलीस यंत्रणा कामाला लागली आणि या भीषण हत्याकांडाचा उलगडा झाला.

पालनपूर शहर पश्चिम पोलिसांनी या प्रकरणाची गांभीर्याने दखल घेत तातडीने तपास चक्रांना गती दिली आहे. संशयाची सुई रेखा राठोडकडे वळताच पोलिसांनी तिला ताब्यात घेऊन सखोल चौकशी केली, ज्यामध्ये तिने आपला गुन्हा मान्य केला आहे. पोलिसांनी मुख्य आरोपी रेखासह अन्य एका साथीदाराला आतापर्यंत अटक केली असून, या गुन्ह्यात सहभागी असलेल्या इतर फरार आरोपींचा शोध घेण्यासाठी विविध पथके रवाना करण्यात आली आहेत. एका वृद्ध महिलेने ज्या विश्वासाने मदतीचा हात पुढे केला, त्याच हातावर रक्ताचे डाग लावणाऱ्या या घटनेमुळे समाजात तीव्र संताप व्यक्त होत आहे. आरोपींना कठोर शिक्षा व्हावी, अशी मागणी आता जोर धरू लागली आहे.

इतर महत्त्वाच्या बातम्या 

22 वर्षीय अविवाहित तरुणीला गेलेले दिवस, कुटुंबापासून लपवलेला गर्भ.. 'त्या' गोळ्या खाल्ल्या अन् काही तासातच...