22 वर्षीय अविवाहित तरुणीला गेलेले दिवस, कुटुंबापासून लपवलेला गर्भ.. 'त्या' गोळ्या खाल्ल्या अन् काही तासातच...
पुण्यातील एका 22 वर्षीय तरुणीने लपवलेल्या गर्भधारणेला एक दुःखद वळण लागले आहे. घरी झालेल्या अनपेक्षित प्रसूतीमुळे आणि अतिरक्तस्रावामुळे सातव्या महिन्यात तिचा आणि तिच्या नवजात बाळाचा मृत्यू झाला.
ADVERTISEMENT
कृष्णा पांचाळ, पुणे: पुणे शहरातून एक धक्कादायक आणि हृदयद्रावक घटना समोर आली आहे. एका 22 वर्षीय अविवाहित तरुणीने गर्भवती असल्याचं कुटुंबापासून लपवलं होतं. घरी झालेल्या अनपेक्षित प्रसूतीनंतर, उपचारादरम्यान अतिरक्तस्रावामुळे तिचा आणि तिच्या नवजात बाळाचा मृत्यू झाला. या घटनेमुळे संपूर्ण परिसरात खळबळ उडाली आहे.
गर्भधारणेच्या सातव्या महिन्यात गर्भधारणा
पोलिसांच्या माहितीनुसार, ती तरुणी अंदाजे सात महिन्यांची गर्भवती होती, परंतु तिने ही गोष्ट आपल्या कुटुंबापासून गुप्त ठेवली होती. मात्र, मंगळवार, 24 मार्च रोजी सकाळी तिने गर्भपाताच्या गोळ्या घेतल्या. त्यानंतर थोड्याच वेळात ती शौचालयात गेली, जिथे तिला तीव्र वेदना आणि अतिरक्तस्रावाचा त्रास जाणवला. तिने घरीच बाळाला जन्म दिला.
हे ही वाचा>> नवजात बाळाला झुडुपात टाकले, भटक्या कुत्र्यांनी लचके तोडत रस्त्यावर आणले; आई-बाप का झाले क्रूर?
काही तासांतच बाळ आणि तरुणीचा मृत्यू
घटनेची माहिती मिळताच, कुटुंबीय घाबरले आणि त्यांनी तात्काळ त्या तरुणीला आणि नवजात बाळाला जवळच्या एका खाजगी रुग्णालयात दाखल केले. प्रथमोपचार दिल्यानंतर, तिची प्रकृती गंभीर असल्याने डॉक्टरांनी तिला ससून रुग्णालयात पाठवले. दरम्यान, नवजात बाळाची प्रकृतीही गंभीर होती. चांगल्या उपचारांसाठी त्याला यशवंतराव चव्हाण स्मृती रुग्णालयात दाखल करण्यात आले. डॉक्टरांनी दोघांनाही वाचवण्यासाठी सर्वतोपरी प्रयत्न केले, परंतु काही तासांतच, आधी बाळ आणि नंतर त्या तरुणीचा मृत्यू झाला.
हे ही वाचा>> सोलापूर : अर्ध्या तासात येतो असं सांगून घराबाहेर पडला, चौदा दिवसांनी कुजलेल्या अवस्थेत आढळला जिम ट्रेनरचा मृतदेह
तरुणीचा मोबाईल फोन फॉरमॅट
या प्रकरणात आणखी एक धक्कादायक घडामोड समोर आली आहे. मृत तरुणीचा मोबाइल फोन फॉरमॅट झाल्याचे समजले असून, त्यामुळे अनेक संशय निर्माण झाले आहेत. ती गर्भवती का होती, तिला औषधे कुठून मिळाली आणि या प्रकरणात आणखी कोणाचा सहभाग होता का, याचा तपास पोलीस करत आहेत.
