प्रेमसंबंधाच्या वादातून महसूल सहाय्यक असलेल्या तरुणीवर कोयत्याचे 8 वार, 2 महिन्यांनी मृत्यू

आरोपीने स्नेहल यांच्या मानेवर  सलग 7 ते 8 वार केले होते. या हल्ल्याची संपूर्ण घटना परिसरातील CCTV कॅमेऱ्यात कैद झाली होती. दिवसाढवळ्या झालेल्या या हल्ल्यामुळे परिसरात खळबळ उडाली होती. दरम्यान, या हल्ल्यानंतर स्नेहल यांनी दोन महिने मृत्यूशी झुंज दिली. दरम्यान, स्नेहलवर हल्ला झाल्यानंतर पोलिसांनी तीन दिवसांत आरोपी अमोल मुळे यांना अटक केली होती. 

हेही वाचा : भीक मागून उदरनिर्वाह करणाऱ्या महिलेचा मृत्यू, पण घरात 30 लाखांची रोकड, नेमकं प्रकरण काय?

दोन महिने मृत्यूशी झुंज दिली, अखेर स्नेहलने प्राण सोडले 

कोयता हल्ल्यात स्नेहल सावंत गंभीर जखमी झाल्या होत्या. प्राथमिक उपचारानंतर त्यांना पुढील उपचारासाठी पुण्यातील रुग्णालयात दाखल करण्यात आले होते. जून महिन्यापासून त्यांच्यावर उपचार सुरू होते. जवळपास दोन महिने मृत्यूशी झुंज दिल्यानंतर बुधवार, 26 ऑगस्ट रोजी उपचारादरम्यान त्यांचा मृत्यू झाला. स्नेहल या पालघर जिल्हाधिकारी कार्यालयात महसूल सहाय्यक म्हणून कार्यरत होत्या. तर आरोपी अमोल मुळे हा उच्च न्यायालयात काम करत असल्याची माहिती समोर आली होती. पोलिसांच्या माहितीनुसार, प्रेमसंबंधातील वादातून हा हल्ला करण्यात आला होता.

हेही वाचा : चौकशीतून पेपर फुटल्याचे समोर, MPSC औषध निरीक्षक भरती प्रक्रिया रद्द; फेरपरीक्षा होणार

आरोपी अमोल मुळे फरार झाला, पण पोलिसांनी तीन दिवसांनी पकडलं 

घटनेनंतर आरोपी अमोल मुळे फरार झाला होता. स्थानिक गुन्हे शाखा आणि पालघर पोलिसांनी दोन ते तीन दिवसांनी त्याला वरखुंटी परिसरातून ताब्यात घेतले होते. याप्रकरणी पालघर पोलीस ठाण्यात गुन्हा दाखल करण्यात आला असून आरोपी सध्या ठाणे कारागृहात बंद आहे. स्नेहल यांच्या मृत्यूनंतर या प्रकरणात पोलीस पुढील कायदेशीर कारवाई करत आहेत. दाखल गुन्ह्यात आवश्यक त्या कलमांची वाढ करण्याची प्रक्रिया केली जाणार आहे.