संपदा मुंडेंनंतर फलटण उपजिल्हा रुग्णालयातील आणखी एका डॉक्टरची आत्महत्या

हेही वाचा : 'शिदेंनी परभणीचा मेळावा रद्द केला होता, पळायला सुद्धा जागा राहिली नसती'

वरिष्ठांकडून कथित त्रास आणि प्रशासकीय दबावाचे आरोप

विशेष म्हणजे, काही महिन्यांपूर्वी याच फलटण उपजिल्हा रुग्णालयातील वैद्यकीय अधिकारी डॉ. संपदा मुंडे यांच्या मृत्यूने राज्यभरात मोठी खळबळ उडाली होती. आता त्याच रुग्णालयाशी संबंधित आणखी एका डॉक्टरचा मृत्यू झाल्याने या प्रकरणाची चर्चा पुन्हा सुरू झाली आहे. डॉ. रूपनवर यांनी आपल्या पत्रांमधून तसेच सोशल मीडिया पोस्टमधून वरिष्ठांकडून कथित त्रास आणि प्रशासकीय दबाव असल्याचे आरोप केले होते. तसेच वैद्यकीय आणि फिटनेस प्रमाणपत्रांबाबत राजकीय व्यक्ती आणि त्यांच्या सहकाऱ्यांकडून दबाव टाकला जात असल्याचेही त्यांनी म्हटले होते.

हेही वाचा : छत्रपती शिवाजी महाराजांच्या बाजूला पंतप्रधानांचा फोटो, अमित ठाकरेंनी काय केलं?

मुंबईतील सायन परिसरात केला होता आत्महत्येचा प्रयत्न

डॉ. रूपनवर यांनी संबंधितांविरोधात तक्रारीही केल्या होत्या. त्यांच्या आरोपांची चौकशी करण्यासाठी समिती नेमण्यात आली होती. मात्र चौकशीचा अहवाल जाहीर होत नसल्याचा आरोप करत डॉ. रूपनवर यांनी वारंवार टोकाचे पाऊल उचलण्याचा इशाराही दिला होता. त्यानंतर मुंबईतील सायन परिसरात त्यांनी आत्महत्येचा प्रयत्न केला. गंभीर अवस्थेत त्यांच्यावर उपचार सुरू होते. काही काळ त्यांच्या प्रकृतीत सुधारणा झाल्याची माहिती होती. मात्र सोमवारी दुपारी उपचारादरम्यान त्यांचा मृत्यू झाला.

डॉ. संपदा मुंडे यांच्यानंतर फलटण उपजिल्हा रुग्णालयाशी संबंधित आणखी एका डॉक्टरचा मृत्यू झाल्याने आरोग्य विभागाच्या कारभारावर अनेक प्रश्न उपस्थित होत आहेत. डॉ. रूपनवर यांनी केलेले प्रशासकीय आणि राजकीय दबावाचे आरोप, त्यांच्याकडून करण्यात आलेल्या तक्रारी आणि चौकशी समितीचा अहवाल जाहीर न झाल्याचा आरोप या पार्श्वभूमीवर आता या संपूर्ण प्रकरणाची निष्पक्ष आणि सखोल चौकशी करण्याची मागणी जोर धरू लागली आहे. डॉ. रूपनवर यांच्या मृत्यूनंतर फलटणच्या आरोग्य विभागातील कथित दबाव आणि कारभारामागे आणखी काही गंभीर वास्तव दडले आहे का, हा प्रश्न उपस्थित झाला आहे.