नामांकित शाळेत आयपीएस अधिकाऱ्याच्या मुलाचा छळ; प्राचार्य अन् शिक्षकांविरोधात गुन्हा दाखल

सुमित भुजबळ

• 07:55 AM • 21 Nov 2026

लखनौतील नामांकित शाळेत आठ वर्षांच्या आयपीएस अधिकाऱ्याच्या मुलाला वरिष्ठ विद्यार्थ्याने मारहाण केल्याचा आरोप. प्राचार्य, समुपदेशक आणि रोबोटिक्स शिक्षकांविरोधात गुन्हा दाखल.

ips officer son bullied

ips officer son bullied

Google CTA
▌

बातम्या हायलाइट

point

नामांकित शाळेत आयपीएस अधिकाऱ्याच्या मुलाचा छळ

point

प्राचार्य अन् शिक्षकांविरोधात गुन्हा दाखल

उत्तर प्रदेशातील लखनौमध्ये एका नामांकित शाळेत वरिष्ठ आयपीएस अधिकाऱ्याच्या आठ वर्षांच्या मुलाला मारहाण आणि शिवीगाळ केल्याचा प्रकार समोर आला आहे. शाळेतील एका वरिष्ठ विद्यार्थ्याने या मुलाला रोबोटिक्सच्या वर्गात त्याच्या जागेवरून खाली ढकलले. त्यानंतर त्याला मारहाण करत अपशब्द वापरल्याचा आरोप आहे. या घटनेनंतर मुलाच्या वडिलांनी पोलिसांकडे तक्रार दाखल केली. विशेष म्हणजे, या प्रकरणात शाळेच्या व्यवस्थापनाने तक्रारीची हाताळणी ज्या पद्धतीने केली, त्यावरही गंभीर आक्षेप घेण्यात आले आहेत. या प्रकरणी शाळेचे प्राचार्य, समुपदेशक आणि रोबोटिक्स शिक्षक यांच्याविरोधात गुन्हा दाखल करण्यात आला आहे.

हे वाचलं का?

हेही वाचा : 'या' जिल्हा बँकेत भाजपने केला मोठा गेम! 10 जागा बिनविरोध, महाविकास आघाडी बॅकफुटवर

मुलाला मोठ्या प्रमाणात मानसिक त्रास झाल्याची तक्रार

मिळालेल्या माहितीनुसार, 15 ऑक्टोबर रोजी शाळेत रोबोटिक्सचा वर्ग सुरू असताना हा प्रकार घडला. यावेळी एका वरिष्ठ विद्यार्थ्याने आठ वर्षांच्या मुलाला त्याच्या जागेवरून खाली ढकलले. त्यानंतर त्याला मारहाण केली आणि शिवीगाळही केली. या घटनेनंतर मुलाने घडलेला प्रकार सांगितला. मात्र, शाळेच्या व्यवस्थापनाने या तक्रारीवर केलेल्या कारवाईवर मुलाच्या कुटुंबीयांनी आक्षेप घेतला आहे. संबंधित वरिष्ठ विद्यार्थ्याची ओळख पटवण्यासाठी शाळेच्या व्यवस्थापनाने पीडित मुलाला एक हजाराहून अधिक विद्यार्थ्यांसमोर उभे केल्याचा आरोप आहे. या प्रकारामुळे मुलाला मोठ्या प्रमाणात मानसिक त्रास आणि अपमान सहन करावा लागल्याचे तक्रारीत म्हटले आहे. त्यामुळे केवळ मारहाणीची घटनाच नव्हे, तर शाळेने तक्रारीची हाताळणी केलेल्या पद्धतीचाही तपास करण्याची मागणी करण्यात आली आहे.

हेही वाचा : रोहित पवारांचे थेट फडणवीसांवर आरोप.., सुप्रिया सुळे प्रतिक्रिया देताना काय म्हणाल्या?

आयपीएस अधिकाऱ्याने दिलेल्या तक्रारीनंतर 11 नोव्हेंबर रोजी लखनौमधील पीजीआय पोलीस ठाण्यात गुन्हा दाखल करण्यात आला. भारतीय बाल न्याय (मुलांची काळजी आणि संरक्षण) अधिनियम, 2015 मधील कलम 75 अंतर्गत शाळेचे प्राचार्य, समुपदेशक आणि रोबोटिक्स शिक्षक यांच्याविरोधात ही कारवाई करण्यात आली आहे. या प्रकरणाची माहिती लखनौ पोलिसांनी सोशल मीडियावरील एक्स या प्लॅटफॉर्मवरून दिली. संबंधित प्रकरणात योग्य कलमांनुसार गुन्हा दाखल करण्यात आला असून निष्पक्ष आणि पारदर्शक तपास सुरू असल्याचे पोलिसांनी स्पष्ट केले. तसेच बाल न्याय कायद्यातील कलम 74 नुसार, गुन्ह्याचा बळी ठरलेल्या बालकाची ओळख उघड करणे हा दंडनीय अपराध असल्याचेही पोलिसांनी सांगितले.

पीडित मुलाची ओळख आणि गोपनीयता जपण्याचे आवाहन

दरम्यान, या प्रकरणातील पीडित मुलाची ओळख आणि गोपनीयता जपण्याचे आवाहन पोलिसांनी केले आहे. मुलाची ओळख उघड होण्याची शक्यता असलेली कोणतीही माहिती, छायाचित्रे किंवा व्हिडिओ प्रसारित करू नयेत, असे पोलिसांनी स्पष्ट केले आहे. दुसरीकडे, संबंधित आयपीएस अधिकाऱ्याने शाळेतील सीसीटीव्ही फुटेजच्या आधारे कारवाई करण्याची मागणी केली आहे. रोबोटिक्सच्या वर्गात नेमके काय घडले, वरिष्ठ विद्यार्थ्याने मुलाला केलेल्या मारहाणीची सत्यता काय आणि त्यानंतर शाळेच्या व्यवस्थापनाने तक्रारीवर कोणती भूमिका घेतली, या सर्व बाबींचा तपास पोलीस करत आहेत. या प्रकरणात शाळेच्या तीन कर्मचाऱ्यांविरोधात गुन्हा दाखल झाल्याने शाळेतील विद्यार्थ्यांच्या सुरक्षिततेचा आणि तक्रारींच्या हाताळणीचा मुद्दा चर्चेत आला आहे.