जालना : छकुलीचे गावातल्या परपुरुषाशी प्रेमसंबंध, प्रियकराच्या मदतीने नवऱ्याची हत्या; अपघाताचा बनाव

हेही वाचा : लाईट लावण्यावरून सावत्र आईची मुलाकडून हत्या, मांडी, कंबर, छाती आणि मानेवर गंभीर जखमा

मोटारसायकलने जोरदार धडक देऊन संपवल्याचा आरोप 

पोलिसात दाखल तक्रारीनुसार, शुभम वाघ यांचा विवाह नोव्हेंबर 2024 मध्ये पुनम उर्फ छकुली हिच्यासोबत झाला होता. लग्नाच्या काही महिन्यांनंतर दोघांमध्ये वाद सुरू झाले. त्याच काळात शुभम यांच्या कुटुंबीयांना पुनमचे गावातील रवी चिंचपुरे याच्यासोबत कथित प्रेमसंबंध असल्याची आणि दोघांमध्ये फोनवरून संपर्क असल्याची माहिती मिळाल्याचे तक्रारीत म्हटले आहे. शुभम यांनी यासंदर्भात कौटुंबिक न्यायालयात दावा दाखल केला होता. तक्रारीनुसार, हा दावा मागे घ्यावा, अन्यथा गंभीर परिणाम होतील, अशी कथित धमकी रवी चिंचपुरे याने 4 जुलै 2026 रोजी शुभम यांना दिली होती. त्यानंतर 7 जुलै 2026 रोजी सायंकाळी सुमारे 7 वाजून 55 मिनिटांनी शुभम नेहमीप्रमाणे भोकरदन रोडवरील आपल्या शेतात झोपण्यासाठी पायी जात होते. त्यावेळी वाकडी-भोकरदन रोडवर कैलास चिंचपुरे यांच्या शेताजवळ सोपान जाधव याने मोटारसायकलने शुभम यांना जोरदार धडक दिल्याचा आरोप तक्रारीत करण्यात आला आहे.

हेही वाचा : Maharashtra Weather : राज्यात पाऊस गायब? तर काही ठिकाणी हलका ते मध्यम..

मृत्यू केवळ अपघात नसून हत्या असल्याचा आरोप

या घटनेची माहिती मिळाल्यानंतर कुटुंबीय आणि ग्रामस्थ घटनास्थळी पोहोचले. त्यावेळी शुभम गंभीर जखमी अवस्थेत आणि बेशुद्ध असल्याचे आढळले. त्यांना तातडीने भोकरदन येथील सरकारी रुग्णालयात नेण्यात आले. मात्र, डॉक्टरांनी त्यांना मृत घोषित केले. सुरुवातीला ही घटना रस्ते अपघात असल्याचे मानले गेले. मात्र, शुभम यांचे वडील येडुबा वाघ यांनी मुलाचा मृत्यू केवळ अपघात नसून हत्या असल्याचा आरोप केला. त्यांनी या प्रकरणाच्या तपासासाठी आणि न्यायासाठी प्रयत्न केले. त्यानंतर त्यांच्या तक्रारीच्या आधारे पोलिसांनी हत्येच्या कलमांतर्गत गुन्हा दाखल केला. तक्रारीनुसार, पुनम आणि रवी चिंचपुरे यांनी सोपान जाधव याच्या मदतीने शुभम यांना रस्त्यातून दूर करण्याची कथित योजना आखली आणि मोटारसायकलने धडक देऊन त्यांची हत्या केल्याचा आरोप आहे.

या प्रकरणात भोकरदन पोलिसांनी मृतकाची पत्नी पूनम वाघ, सोपान जाधव आणि रवि चिंचपुरे यांना अटक केली आहे. तिघांना न्यायालयात हजर केल्यानंतर न्यायालयाने त्यांना 30 सप्टेंबरपर्यंत पोलीस कोठडी सुनावली आहे. सध्या पोलीस या प्रकरणातील कथित हत्येचा कट, प्रत्येक आरोपीची भूमिका आणि घटनेशी संबंधित इतर बाबींचा तपास करत आहेत. या प्रकरणाचा पुढील तपास पोलीस उपनिरीक्षक प्रवीण सोनावणे करत आहेत. पोलिसांच्या तपासातून समोर येणाऱ्या तथ्यांनंतर या कथित हत्येची नेमकी पार्श्वभूमी आणि प्रत्येक आरोपीची भूमिका स्पष्ट होणार आहे.