सहकारी कॉन्स्टेबलला लग्नाचं अमिष अन्..

आरोपी कॉन्स्टेबल मुकेश सारण याने एका सहकारी महिला कॉन्स्टेबलला लग्नाचे आमिष दाखवून दीर्घकाळापासून तिचे शारीरिक व मानसिक शोषण केल्याचा आरोप आहे. पीडित महिला कॉन्स्टेबलने या त्रासाला कंटाळून अखेर सिव्हिल लाइन्स पोलीस ठाण्यात आरोपीविरुद्ध रीतसर तक्रार नोंदवली, ज्यानंतर हे संपूर्ण प्रकरण चव्हाट्यावर आले. महिला कॉन्स्टेबलने तक्रार दाखल केल्याची कुणकुण लागताच आरोपी मुकेश सारण तात्काळ फरार झाला असून पोलीस तेव्हापासूनच त्याचा कसून शोध घेत आहेत. आरोपीने लग्नाचं खोटं वचन देऊन सातत्याने पीडितेचं लैंगिक शोषण केलं आणि नंतर तो आपल्या शब्दापासून फिरला, असे तक्रारीत नमूद करण्यात आले आहे.

हे ही वाचा : भाजपला जमलं नाही, ते कॉकरोच जनता पार्टीने करुन दाखवलं! काय घडलं?

50 लाख रुपये हडपले

मिळालेल्या माहितीनुसार, हे प्रकरण केवळ शारीरिक किंवा मानसिक शोषणापुरतेच मर्यादित नसून यामध्ये मोठ्या प्रमाणावर आर्थिक फसवणूकही झाल्याचे उघडकीस आले आहे. पीडित महिला कॉन्स्टेबलने आपल्या तक्रारीत आरोप केला आहे की, मुकेश सारण याने तिचा पूर्ण विश्वास संपादन करून तिच्याकडून तब्बल 50 लाख रुपयांपेक्षा जास्त रक्कम हडप केली. इतकेच नव्हे तर, आरोपीने तिचे सोन्याचे दागिनेही स्वतःकडे काढून घेतले आणि तिला आर्थिक व मानसिकदृष्ट्या पूर्णपणे उद्ध्वस्त केले. हे गंभीर प्रकरण समोर येताच अजमेर पोलीस अधीक्षकांनी शिस्तभंगाची कारवाई करत आरोपी कॉन्स्टेबल मुकेश सारण याला आधीच सेवेतून बडतर्फ केले होते, आणि आता त्याला अटक करण्यासाठी बक्षीस जाहीर केले आहे.

हे ही वाचा : पाकिस्तानचा माजी गोलंदाज मोहम्मद आमिरला IPL खेळता येणार? कसं?

पोलीस दलात खळबळ

या संपूर्ण घटनेने पोलीस दलात आणि जनमानसात मोठी खळबळ उडवून दिली आहे. कायदा व सुव्यवस्थेचे रक्षक असलेल्या पोलीस विभागातीलच एका कर्मचाऱ्याने आपल्या महिला सहकाऱ्यासोबत अशा प्रकारचा विश्वासघात करावा, याबद्दल आश्चर्य आणि संताप व्यक्त होत आहे. सध्या अजमेर पोलीस आरोपीच्या सर्व संभाव्य ठिकाणांवर बारीक लक्ष ठेवून असून, त्याच्या मोबाईलचे लोकेशन आणि संपर्कातील लोकांची कसून चौकशी केली जात आहे. तसेच, फरार झाल्यानंतर त्याला कोण मदत करत आहे, याचा शोधही घेतला जात आहे. पीडितेच्या तक्रारीच्या आधारे तपास अजूनही सुरू असून, आरोपीला लवकरात लवकर बेड्या ठोकून न्यायालयासमोर हजर करण्यासाठी पोलिसांनी आपली शोध मोहीम अत्यंत तीव्र केली आहे.