Sukhdev Singh Gogamedi Murder: …त्यालाही घातल्या गोळ्या, शेवटच्या 10 मिनिटांत काय घडलं?

Sukhdev Singh Gogamedi News Today : राष्ट्रीय राजपूत करणी सेनेचे प्रमुख सुखदेव सिंह गोगामेडी यांची मंगळवारी जयपूरमध्ये भरदिवसा गोळ्या घालून हत्या करण्यात आली. गँगस्टर रोहित गोदाराशी संबंधित काही अज्ञात आरोपींनी गोगामेडींच्या घरातच हे घडवलं. आरोपी आधी सुखदेव यांच्याशी बोलत राहिले आणि नंतर अचानक दोघांनी गोळीबार केला. ही संपूर्ण घटना अवघ्या 10 मिनिटांत घडली. अखेरच्या दहा मिनिटांत काय घडलं, हे आता समोर आले आहे.

जयपूर पोलिसांनी दिलेल्या माहितीनुसार, मंगळवारी (5 डिसेंबर) दिवसाढवळ्या दोन बदमाशांनी गोगामेडींवर गोळीबार केला आणि तेथून पळ काढला. गोगामेडी यांना मेट्रो मास हॉस्पिटलमध्ये नेण्यात आले, पण डॉक्टरांनी त्यांना मृत घोषित केले. या गोळीबारात तेथे उपस्थित असलेले गोगामेडींचे गार्ड अजित सिंह हेही गंभीर जखमी झाले.

पोलिसांनी दिलेल्या माहितीनुसार, गोगामेडी यांच्या घरी हल्लेखोरांना घेऊन गेलेल्या तरुणाचाही गोळीबारात मृत्यू झाला. नवीन शेखावत असे त्याचे नाव आहे. हत्येची जबाबदारी घेत गँगस्टर रोहित गोदाराने सोशल मीडियावर पोस्ट शेअर केली आहे.

आधी चर्चा, मग झाडला गोळ्या

आधी तीन लोक सुखदेव यांच्या घरी पोहोचले. मग ते सोफ्यावर बसले आणि गोगामेडींशी बोलू लागले. सुमारे 10 मिनिटांनंतर दोन हल्लेखोर उठले आणि त्यांनी गोळीबार सुरू केला. गोळीबार सुरू असताना गोगामेडींच्या गार्डने त्यांना वाचवण्याचा प्रयत्न केला. त्याच्यावरही हल्लेखोरांनी गोळीबार केला. तेथून निघाले असताना एका गुंडाने गोगामेडी यांच्या डोक्यात गोळी झाडली. हल्लेखोरांनी केलेल्या गोळीबारात नवीन नावाच्या व्यक्तीलाही गोळी लागली.

हेही वाचा >> “आपण पण वाहवत गेलो तर…”; बाबासाहेबांचा जुना फोटो शेअर करत राज ठाकरेंनी व्यक्त केली चिंता

हल्लेखोर स्कूटरसह गेले पळून

गोळीबारानंतर दोन हल्लेखोर धावत रस्त्यावर आले आणि त्यांनी कार थांबवून लुटण्याचा प्रयत्न केला. त्याने चालकाला पिस्तूल दाखवताच चालक पळून गेला. यादरम्यान मागून येणाऱ्या स्कूटरस्वाराला गोळीबारांनी लक्ष्य केले. स्कूटरस्वाराला हल्लेखोरांनी गोळ्या घातल्या. यानंतर तोही जखमी झाला. यानंतर हल्लेखोर पळून गेले.

नवीन यांच्यावर हल्लेखोरांनी झाडल्या गोळ्या

माहिती मिळताच श्याम नगर पोलीस घटनास्थळी पोहोचले. गोगामेडी यांच्या संघटनेशी संबंधित लोकांनी रुग्णालयाबाहेर निदर्शने सुरू केली. न्याय मिळावा या मागणीसाठी त्यांनी मानसरोवरात रास्ता रोको केला आहे. हल्लेखोरांच्या गोळीबारात ज्या नवीनचा मृत्यू झाला, तोच हा नवीन होता ज्याने हल्लेखोरांची गोगामेडींशी भेट घडवून आणली होती.

हेही वाचा >> “ज्यांना गद्दारी करून…”, भाजप आमदाराचे श्रीकांत शिंदेंच्या वर्मावर बोट

घटनेचे सीसीटीव्ही फुटेज

जयपूरचे पोलीस आयुक्त बिजू जॉर्ज जोसेफ यांनी दिलेल्या माहितीनुसार, मृत नवीन सिंह शक्तिवत हा शाहपुरा येथील रहिवासी होता. नवीन हा जयपूरमध्ये कपड्यांचा व्यवसाय करायचा. पोलिसांकडे सर्व आरोपी आणि घटनेचे सीसीटीव्ही फुटेज आहेत. घटनास्थळावरून पळून गेलेल्या दोन्ही आरोपींचा शोध सुरू आहे.

हल्लेखोरांची कार जप्त

आरोपी एसयूव्ही कारमध्ये आले होते, जी पोलिसांनी गोगामेडींच्या घराबाहेरून जप्त केली आहे. त्या गाडीतून एक पिशवी, दारूची बाटली आणि रिकामे ग्लास सापडले. घटनेनंतर एफएसएल टीमच्या मदतीने गोळीबाराच्या ठिकाणाहून म्हणजे घटनास्थळावरून सर्व प्रकारचे पुरावे गोळा करण्यात आले आहेत.

गँगस्टर रोहित गोदाराने घेतली जबाबदारी

घटनेनंतर गुंड रोहित गोदाराच्या नावाने तयार केलेल्या फेसबुक पेजवरून या हत्येची जबाबदारी स्वीकारण्यात आली. त्या पोस्टमध्ये लिहिले आहे की, “सर्व भावांना राम राम, मी रोहित गोदरा कपूरीसर, गोल्डी ब्रार. बंधूंनो, आज सुखदेव गोगामेडी यांची हत्या झाली. आम्ही याची संपूर्ण जबाबदारी घेतो. आम्ही ही हत्या घडवून आणली आहे. बंधूंनो, मला तुम्हाला सांगायचं आहे की, तो आपल्या शत्रूंना साथ द्यायचा. त्यांना ताकद द्यायचा. आता राहिला प्रश्न शत्रूंचा, तर त्यांनी त्यांच्या घराच्या दारात त्यांचे तिरडी तयार ठेवावी. त्यांना लवकरच भेटू.”

हेही वाचा >> पत्नीच्या डोक्यात घातला दांडा, नंतर…; रिक्षाचालकाच्या कृत्याने कल्याण हादरले

सुखदेव गोगामेडी असे आले होते चर्चेत

2017 मध्ये जयगडमध्ये पद्मावत चित्रपटाच्या शूटिंगदरम्यान राजपूत करणी सेनेच्या लोकांनी तोडफोड केली होती. पद्मावत चित्रपट आणि गँगस्टर आनंदपाल एन्काउंटर प्रकरणानंतर राजस्थानमध्ये झालेल्या विरोधामुळे गोगामेडी प्रसिद्धीच्या झोतात आले होते.

सुखदेव गोगामेडी राष्ट्रीय करणी सेनेशी संबंधित

हल्लेखोरांच्या हातून मारले गेलेले सुखदेव सिंग गोगामेडी हे राष्ट्रीय राजपूत करणी सेनेचे राष्ट्रीय अध्यक्ष होते. याआधी ते दीर्घकाळ राष्ट्रीय करणी सेनेसोबत होते. मात्र वादानंतर त्यांनी राष्ट्रीय राजपूत करणी सेना या नावाने वेगळी संघटना स्थापन केली.

2017 मध्ये स्थापन केली स्वतःची संघटना

2006 मध्ये पहिल्यांदा करणी सेनेची स्थापना झाली. पुढे लोकेंद्रसिंग कालवी यांनी राजपूत करणी सेना ही वेगळी संघटना स्थापन केली. 2012 मध्ये सुखदेव सिंह गोगामेडी यांना श्री राजपूत करणी सेनेचे प्रदेशाध्यक्ष बनवण्यात आले होते, मात्र नंतर कालवी आणि गोगामेडी यांच्यात वाद झाला. सुखदेव सिंह गोगामेडी यांनी 2017 मध्ये श्री राष्ट्रीय राजपूत करणी सेना या नावाने स्वतंत्र संघटना स्थापन केली होती.

कोण आहे रोहित गोदरा?

दुसरीकडे गोगामेडीच्या हत्येची जबाबदारी स्वीकारणारा गँगस्टर रोहित गोदारा हा गँगस्टर लॉरेन्स विश्नोई टोळीचा हस्तक आहे. पोलिसांनी त्याच्यावर एक लाख रुपयांचे बक्षीस जाहीर केले आहे. गोदरा साला 2022 मध्ये बनावट नावाने पासपोर्ट बनवून देशातून पळून गेला होता. परदेशात जाण्यापूर्वी गोदरा बिकानेरच्या लुंकरानसार येथे राहत होता. 2019 मध्ये सरदारशहर, चुरू येथे भिनवराज सरन यांच्या हत्येप्रकरणीही तो मुख्य आरोपी होता. गुंड राजू थेहाटच्या हत्येची जबाबदारीही गोदाराने घेतली होती.