नाना पाटेकरांचे मूळनाव काय?

ज्येष्ठ अभिनेते नाना पाटेकर यांचा जन्म 1 जानेवारी 1951 रोजी महाराष्ट्रातील रायगड जिल्ह्यातील मुरुड-जंजीरा येथे एका मराठी कुटुंबात झाला. त्यांच्या वडिलांचे नाव दिनकर पाटेकर तर आईचे नाव निर्मला पाटेकर होते. मुंबईतील बांद्रा स्कूल ऑफ आर्टमधून कला शाखेचे शिक्षण घेतलेल्या नाना पाटेकरांचे मूळनाव 'विश्वनाथ पाटेकर' असे आहे. शाळा-कॉलेजच्या दिवसांत त्यांना सर्वजण याच नावाने किंवा प्रेमाने 'विशू' म्हणून ओळखत असत.

हे ही वाचा : नाना पाटेकरांची पत्नी कोण आहे? जिंकलेला नॅशनल अवॉर्ड; अनेक वर्षांपासून राहायचे वेगळे

नाना ही ओळख कशी मिळाली?

आज संपूर्ण जग त्यांना 'नाना पाटेकर' या नावाने ओळखत असले, तरी हे नाव त्यांना जन्मतः मिळालेले नव्हते. या नावामागे त्यांच्या बालपणीची एक रंजक आठवण दडलेली आहे. एका मुलाखतीदरम्यान स्वतः नानांनी याचा खुलासा केला होता. त्यांच्या आईची एक अत्यंत जवळची मैत्रीण होती. बालपणी त्या नानांना अत्यंत प्रेमाने 'नाना-नाना' म्हणून हाक मारायच्या.

हे ही वाचा : 'मला अस्वस्थ वाटू लागलंय', नाना पाटेकरांनी पहाटे मित्राला कळवलं, गोव्यात काय घडलं?

अधिकृत कागदपत्रांवर काय नाव?

हे नाव हळूहळू पाटेकर कुटुंबात एवढे रुळले की, सगळेच त्यांना 'नाना' म्हणून हाक मारू लागले. शाळेत किंवा जुन्या मित्रांमध्ये ते 'विश्वनाथ' किंवा 'विशू' म्हणूनच ओळखले जायचे. नानांच्या मते, आजही जर कोणी त्यांना 'विशू' अशी हाक मारली, तर तो त्यांच्या शालेय जीवनातील जुना मित्र किंवा परिचित आहे हे ते त्वरित ओळखतात. परंतु काळाच्या ओघात 'नाना' हे नाव इतके लोकप्रिय झाले की त्यांनी मूळ नावाऐवजी हेच नाव आपलेसे केले. आज त्यांच्या सर्व अधिकृत कागदपत्रांवर, जसे की पासपोर्ट आणि इतर महत्त्वाच्या शासकीय दस्तऐवजांवर,'नाना पाटेकर' हेच नाव नोंदवले गेले आहे.