'ट्रोलिंगला कंटाळून विष प्राशन'

सतत होणाऱ्या ट्रोलिंग आणि मानसिक त्रासाला कंटाळून अखेर अनिता बिश्नोई यांनी इंस्टाग्रामवर थेट (लाइव्ह) येत आपली व्यथा मांडली. लाईव्ह दरम्यान त्यांनी अत्यंत भावूक होत आरोप केला की, काही लोक त्यांना जाणीवपूर्वक बदनाम करण्याचा आणि मानसिक छळ करण्याचा प्रयत्न करत आहेत. जर कोणाला तक्रार असेल तर त्यांनी समोर येऊन बोलावे, कायदा आपले काम करेल, असे आव्हान त्यांनी ट्रोलर्सना दिले. अनिता यांचे पती दिनेश यांनी दिलेल्या माहितीनुसार, ते घराबाहेर असताना अनिता इंस्टाग्रामवर लाईव्ह येऊन एका दुसऱ्या इन्फ्लुएंसरवर त्रास देत असल्याचा आरोप करत असल्याची माहिती त्यांना मिळाली. त्यानंतर काही वेळातच त्यांच्या मुलाचा फोन आला आणि त्याने सांगितले की, अनिता यांनी विषारी पदार्थ प्राशन केला आहे.

हे ही वाचा : पार्टीत ‘तो’ टीशर्ट घातल्याने ट्रोलिंग, अखेर रितेश देशमुखने मागितली माफी; म्हणाला...

नवरा पोलिसांत दाखल करणार तक्रार

या धक्कादायक घटनेनंतर कुटुंबीयांनी अनिता यांना तातडीने जोधपूरच्या एमडीएम (MDM) रुग्णालयात दाखल केले. तेथे त्यांना अतिदक्षता विभागात (ICU) भरती करण्यात आले असून त्यांच्यावर उपचार सुरू आहेत. रुग्णालय प्रशासनाने दिलेल्या माहितीनुसार, सध्या अनिता यांची प्रकृती स्थिर असून त्या धोक्याबाहेर आहेत, मात्र डॉक्टर त्यांची देखरेख करत आहेत. दुसरीकडे, अनिता यांचे पती दिनेश यांनी गंभीर आरोप केला आहे की, एक सोशल मीडिया इन्फ्लुएंसर अनिता यांना सतत ट्रोल करत होता आणि इतर क्रिएटर्सनाही त्यांच्याविरुद्ध भडकावत होता. तसेच त्यांच्या कुटुंबालाही धमक्या दिल्या जात होत्या. याप्रकरणी ते आता पोलिसांत अधिकृत तक्रार दाखल करणार आहेत.

हे ही वाचा : धड शेतात अन् मुंडकं नदीत, नवऱ्याला संपवताना बायको बघत बसली; नेमकं कारण काय?

ऑनलाईन छळाचा मुद्दा ऐरणीवर

अनिता बिश्नोई यांच्या या टोकाच्या पाऊलामुळे सोशल मीडियावरील ट्रोलिंग आणि ऑनलाइन छळाचा मुद्दा पुन्हा एकदा ऐरणीवर आला आहे. एखाद्याच्या विचारांशी असहमती असणे स्वाभाविक आहे, परंतु त्याचे रूपांतर वैयक्तिक अपमान, धमक्या आणि मानसिक छळात होणे हे कोणत्याही व्यक्तीला गंभीर तणावाखाली ढकलू शकते, हे या घटनेवरून पुन्हा सिद्ध झाले आहे. सोशल मीडिया हे अभिव्यक्तीचे साधन असले, तरी त्याचा वापर अत्यंत जबाबदारीने आणि संवेदनशीलतेने करणे किती गरजेचे आहे, याकडेच ही दुर्दैवी घटना लक्ष वेधून घेते.