स्वरसम्राज्ञी आशाताई अनंतात विलीन, शासकीय इतमामात अंत्यसंस्कार, उपस्थितांना अश्रू अनावर

हे ही वाचा : पुण्यात PhD चे शिक्षण घेणाऱ्या 30 वर्षीय तरुणीनं संपवलं जीवन, सुसाईड नोटमध्ये छेडछाडीचा आरोप अन् भयंकर...

मुख्यमंत्री आणि उपमुख्यमंत्र्यांनी वाहिली श्रद्धांजली

त्यांच्या निधनाने भारतातील संगीत विश्वात मोठी पोकळी निर्माण झाली आहे. आशा भोसलेंना अखेरचा निरोप देण्यासाठी बॉलिवूडसह राजकीय नेत्यांनी आपली उपस्थिती दर्शवली. राज्याचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे आणि सुनेत्रा पवार यांनी पुष्पचक्र अर्पण करून श्रद्धांजली वाहिली. 

आशा भोसलेंना अखेरचा निरोप देण्यासाठी बॉलिवूडसह राजकीय नेत्यांनी श्रद्धांजली वाहिली

तसेच ठाकरे गटाचे प्रमुख उद्धव ठाकरे, आदित्य ठाकरे आणि पत्नी रश्मी ठाकरे यांना अश्रू अनावर झाले. मंगलप्रभात लोढा, भैय्याजी जोशी, सुप्रिया सुळे, आशिष शेलार, राज्यपाल जिष्णु देव शर्मा आणि विश्वास नांगरे पाटील यांनी पार्थिवाचं अंत्यदर्शन घेतलं. 

दरम्यान बॉलिवूड अभिनेता अमिर खान, अभिनेत्री तब्बू, अभिनेत्री आशा पारेख, रितेश देशमुख, राकेश रोशन, नीना गुप्ता,विकी कौशल, अनु मलिक यांच्यासह काही कलाकारांनी पार्थिवाचं दर्शन घेतलं होतं, नंतर शिवाजी पार्क स्मशानभूमीत आशा भोसले यांना श्रद्धांजली वाहिली. 

20 हून अधिक भारतीय भाषांमध्ये 12 हजारांहून अधिक गाणी गायली

आशा भोसले यांनी मराठी आणि हिंदीच नव्हे तर 20 हून अधिक भारतीय भाषांमध्ये 12 हजारांहून अधिक गाणी गायली. शास्त्रीय संगीत, सुगम संगीत, गझल, लावणी आणि पॉप संगीत अशा सर्वच प्रकारांत त्यांनी आपला वेगळा ठसा उमटवला होता. त्यांच्या या प्रदीर्घ प्रवासासाठी त्यांना भारत सरकारकडून 'पद्मविभूषण' आणि चित्रपट सृष्टीतील सर्वोच्च 'दादासाहेब फाळके' पुरस्काराने सन्मानित करण्यात आले होते.

हे ही वाचा : कल्याण-मुरबाड महामार्गावर भीषण अपघात, ईको कार आणि सिमेंट मिक्सर ट्रकच्या धडकेत 11 जणांचा दुर्दैवी अंत

हिंदी सिनेसृष्टीतील दिग्गज संगीतकारांसोबत केलं काम

हिंदी सिनेसृष्टीतील दिग्गज संगीतकार आरडी बर्मन, ओपी नैय्यर, सचिन देव बर्मन, लक्ष्मीकांत प्यारेलाल यांच्यासोबत त्यांनी अजरामर गाणी गायली. त्यांच्या जाण्याने केवळ संगीत क्षेत्रच नाही,तर सर्वच स्तरातील लोकांनी हळहळ व्यक्त केली आहे.