मुंबईकरांचं हे टॉर्चर थांबवा; अभिनेते किशोर कदम यांची सरकार आणि पोलिसांना विनंती

अभिनेते किशोर कदम यांनी फेसबुकवर पोस्ट लिहिली आहे. ज्यात त्यांनी मास्क न वापरणाऱ्या व्यक्तीकडून दंड वसूल करणाऱ्या लोकांबरोबरच गाडी पार्क करण्याबद्दल आक्षेप घेत काही जणांकडून पैसे घेतले जात असल्याचं म्हटलं आहे.

किशोर कदम यांनी काय म्हटलंय?

“अंधेरी पूर्व आणि इतर ठिकाणी राखाडी रंगाचे वा साध्या ड्रेस मधील लोक व काही स्त्रिया प्रायव्हेट गाड्यांमधून वा रस्त्यावरून चाललेल्या कुठल्याही माणसाला धरून तोंडावर मास्क असून, तो नाकाच्या वर नव्हता असं सांगत फोटो काढून पैसे उकळत आहेत. अंधेरी पोलीस आणि शासनाच्या लोकांचे या कडे लक्ष जाईल का?.”

“तसंच मुंबईतल्या कुठल्याही गल्लीत साधी गाडी पार्क केली की निळ्या पोषाखातली वा साध्या पोषाखातले लोक येउन कुठलं तरी आयकार्ड दाखवून पे पार्कचे पैसे दादागिरी करत उकळताहेत. हे काय चाललंय सगळं. कृपया शासनाने याकडे लवकरात लक्ष देउन मुंबईकरांचं हे टॉर्चर थांबवावं ही विनंती”, असं किशोर कदम यांनी म्हटलं आहे.

क्लिन अप मार्शलला दंड देण्यापूर्वी ही गोष्ट करा…

कोरोना प्रतिबंधात्मक उपाय योजनांचा भाग म्हणून मुंबई महापालिका क्षेत्रात मास्क लावणे बंधनकारक करण्यात आलेलं आहे. त्याचबरोबर सार्वजनिक ठिकाणी थुंकल्यास २०० रुपये दंड वसूल केला जातो.

क्लिन अप मार्शलला दंडाची रक्कम देण्यापूर्वी नागरिकांनी त्याने गणवेष परिधान केलेला आहे की नाही हे बघावं. त्या गणवेषावर संबंधित विभागाचे नाव व अनुक्रमांक नमूद केला आहे की नाही याचीही खात्री करून घ्यावी. दंड रक्कमेची पावती घ्यावी. यासंदर्भातील तक्रारीसाठी १८००२२१९१६ या टोल फ्री क्रमांकावर संपर्क साधावा, असं महापालिकेकडून केलं जात आहे.

ही कारवाई करण्यासाठी महापालिकेकडून क्लीन अप मार्शल नेमण्यात आलेले आहेत. या मार्शलला दंड देण्यापूर्वी काही गोष्टीची खात्री करून घेण्याचं आवाहन महापालिकेकडून करण्यात आलेलं आहे.