अमरावतीनंतर अकोल्यातही दोन दिवसांची संचारबंदी लागू, पोलिसांचा कडेकोट बंंदोबस्त

अमरावती दंगलीच्या पार्श्वभूमीवर सध्या शहरात तणावपूर्ण शांतात आहे. परंतू कोणताही अनुचित प्रसंग घडू नये यासाठी अकोट आणि अकोला या दोन्ही शहरांमध्ये दोन दिवसांची संचारबंदी लागू करण्यात आली आहे. जिल्हा प्रशासनाने तसे आदेश जारी केले आहेत.

आज सकाळी ७ ते संध्याकाळी ७ वाजेपर्यंत जमावबंदीचा आदेश लागू करण्यात आला असून रात्री ७ वाजल्यापासून सकाळी ७ वाजेपर्यंच संचारबंदीचा आदेश देण्यात आला आहे. अमरावती दंगलीच्या पार्श्वभूमीवर अकोला शहरातही वातावरण बिघडवण्याचे प्रयत्न सुरु आहेत. दोन दिवसांपूर्वी अकोला शहरात भंगाराच्या दुकानाला आग लावल्याचा मेसेज सोशल मीडियावर व्हायरल झाला होता.

अमरावती हिंसाचार : चिथावणी देणाऱ्या 36 पोस्ट सायबर पोलिसांच्या हाती; वाचा काय आहे पोस्टमध्ये?

शहरांत अफवांचा बाजार पेटलेला असताना कोणताही अनुचित प्रसंग घडू नये यासाठी प्रशासनाने संचारबंदीचे आदेश जारी केले आहेत. अकोला शहराच्या प्रमुख रस्त्यांवर आणि अतिसंवेदनशील भागांत पोलिसांनी कडक बंदोबस्त ठेवला आहे. अमरावती आणि अकोल्याचे पोलीस अधिक्षक स्वतः रस्त्यावर उतरुन सर्व बंदोबस्त चोख आहे याची काळजी घेत आहेत.

दरम्यान, अमरावतीमध्ये झालेल्या हिंसाचाराचा फटका सामान्य जनतेलाही बसला आहे. पुन्हा कोणताही अनुचित प्रसंग घडू नये यासाठी अमरावती शहरात इंटरनेट सेवा बंद करण्यात आली आहे. परंतू यामुळे अनेक विद्यार्थी आणि व्यापाऱ्यांच्या अडचणीत भर पडत आहे. त्यामुळे इंटरनेटच्या शोधात ही सर्व मंडळी शहराच्या वेशीबाहेर जाऊन महामार्गानजिक कोपऱ्यावर बसून अभ्यास करताना दिसत आहे.

अमरावती ट्रेडींग आणि शेअर बाजाराचा व्यवसाय करणाऱ्या एका तरुणाला या दोन ते तीन दिवसांमध्ये इंटरनेट सेवा बंद असल्यामुळे ८० हजारांचं नुकसान झालंय. हे नुकसान भरुन काढण्यासाठी हा तरुण आता शहराबाहेर येऊन इंटरनेटची रेंज येत असेल तिकडे आपलं ट्रेडिंगचं काम करतोय. अशीच अवस्था येथील ट्रॅव्हल बुकींग एजंट, विद्यार्थी यांची झाली आहे. त्यामुळे लवकरात लवकर शहरातली परिस्थिती पूर्ववत व्हावी अशी प्रार्थना ही मंडळी करत आहेत.

दंगलीनंतर अमरावतीत बंधुभावाचे रंग, मुस्लीम व्यक्तींचा देवळासाठी पहारा…हिंदूंची दर्ग्यात गस्त