आरे कारशेड आंदोलनासाठी परदेशातून पैसा आणला, किरीट सोमय्यांचा गंभीर आरोप

मुंबई: आरे कारशेड (Aarey car Shed) प्रकल्पाविरोधात चालवण्यात आलेल्या आंदोलनाला मदत करण्यासाठी विदेशी पैसा आल्याचा आरोप भाजपचे ज्येष्ठ नेते किरीट सोमय्या (Kirit Somaiya) यांनी केला आहे. किरीट सोमय्या यांनी एनजीओ वनशक्ती आणि बेंगळुरूस्थित कंपनीसह एका वेबसाइटचे नाव देताना सांगितले की, आता हे सिद्ध झाले आहे की आरेमध्ये आंदोलन करण्यासाठी विदेशी पैसा वापरला गेला.

“बंगळुरूस्थित टेक कंपनीला परदेशातून चार कोटी रुपये मिळाले. या संपूर्ण मोहिमेत हेराफेरी करण्यात आली. zhatka org ने 82 हजार ईमेल पाठवले होते. महाराष्ट्र सरकार आणि एमएमआरसीएलने मुंबई पोलिसांकडेही तक्रार केली होती. एफआयआर नोंदवण्यात आला असून तपास सुरू आहे. या सर्व बाबी उघडकीस आल्याने काही लोकांना अटकही होणार होती. परदेशातून पैसा कोणी पाठवला हेही समोर येत आहे. त्यानंतर उद्धव ठाकरे सरकारने हा तपास थांबवला आणि पोलिसांना एफआयआर बंद करण्यास सांगण्यात आले आणि कोर्टात क्लोजर रिपोर्ट सादर करण्यात आला.

Uddhav Thackeray: “धनुष्यबाण शिवसेनेचाच आहे, शिवसेनेचाच राहणार”

किरीट सोमय्यांनी या प्रकरणाचा तपास पुन्हा सुरू करण्याची मागणी केली आहे. तसेच रॉयल पाम खाजगी बिल्डरच्या जमिनीची वकिली केल्याबद्दल वनशक्ती एनजीओला दोषी ठरवले आणि असा दावा केला की बिल्डरला डीलसह 4,800 कोटींचा टीडीआर मिळू शकतो. “मुंबई मेट्रो 3 चे काम लवकरात लवकर सुरू व्हावे, अशी आमची मागणी आहे.” असे सोमय्या म्हणाले.

सोमय्यांनी असेही सांगितले की मागील उद्धव ठाकरे सरकारने आरे येथील मुंबई मेट्रो 3 कारशेड प्रकल्पाचे काम थांबवले. त्यामुळे कुलाबा-वांद्रे-सीप्झ मेट्रो कॉरिडॉरच्या खर्चात 10,000 कोटींची वाढ झाली आहे. “मी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना विनंती केली आहे की आरे कारशेड प्रकल्पाचे काम लवकरात लवकर सुरू करावे.” असे किरीट सोमय्या म्हणाले.