आधी केक कापला, मग केला दोस्ताचा मर्डर; चेहऱ्यावर केक लावल्यानंतर उडाली खळबळ

हेही वाचा : 'सिलेंडर आणायचाय? चला सोडतो', शेजाऱ्याने लिफ्ट देण्याच्या बहाण्याने महिलेला मित्राच्या घरी नेलं अन्...

धारदार शस्त्राने हल्ला, उपचारादरम्यान तरुणाचा मृत्यू 

पोलिसांच्या माहितीनुसार, ही घटना गुरुवारी रात्री घडली. नीरजचा वाढदिवस असल्याने तो काही मित्रांसोबत आधी रिंग रोडच्या दिशेने गेला होता. त्यानंतर बक्षी नगरमध्ये केक कापण्याचा प्लॅन करण्यात आला. पुढे सर्वजण लोअर रूपनगर येथे पोहोचले. रस्त्याच्या कडेला गाडी उभी करून मित्रांनी तिथेच वाढदिवस साजरा करण्यास सुरुवात केली. केक कापल्यानंतर मित्रांनी नीरजच्या चेहऱ्यावर केक लावला. यावेळी सर्वजण हसत-मस्करी करत होते. मात्र त्याच दरम्यान पवन कुमार आणि नीरज यांच्यात कोणत्यातरी मुद्द्यावरून वाद झाला. पोलिसांच्या माहितीनुसार, वाद वाढल्यानंतर दोन्ही बाजूंमध्ये धक्काबुक्की झाली. त्यानंतर नीरज आणि अंकुश यांनी पवनवर धारदार शस्त्राने हल्ला केल्याचा आरोप आहे. या हल्ल्यात पवनच्या मानेवर गंभीर दुखापत झाली.

हेही वाचा : ममता बॅनर्जींच्या पक्षाला मिळालं नवं चिन्ह, फुटीर गटाच्या चिन्हालाही निवडणूक आयोगाकडून मान्यता

कुटुंबावर दुःखाचा डोंगर कोसळला

घटनेनंतर घटनास्थळी उपस्थित असलेल्या लोकांनी पोलिसांना माहिती दिली. जानीपूर पोलीस घटनास्थळी पोहोचले आणि गंभीर जखमी पवनला जीएमसी जम्मू येथे उपचारासाठी दाखल केले. मात्र उपचारादरम्यान त्याचा मृत्यू झाला. पवन कुमारचे वय सुमारे 35 वर्षे होते. तो जम्मूच्या बारी ब्राह्मणा परिसरातील तेली बस्ती येथील रहिवासी होता. तो नगरपालिकेत काम करत असल्याचे सांगण्यात आले आहे. त्याच्या कुटुंबात तीन मुली आहेत. वाढदिवसाच्या पार्टीला गेलेल्या पवनच्या कुटुंबीयांना काही वेळातच त्याच्या मृत्यूची बातमी मिळाली. या घटनेनंतर कुटुंबावर दुःखाचा डोंगर कोसळला. शवविच्छेदनाची प्रक्रिया पूर्ण झाल्यानंतर पोलिसांनी पवनचा मृतदेह कुटुंबीयांच्या ताब्यात दिला. पवनवर हल्ला केल्यानंतर आरोपींनी तिथे उपस्थित इतर तरुणांवरही हल्ला केल्याचा आरोप आहे.

जानीपूर पोलीस ठाण्याचे प्रभारी शारिक माजिद भट यांनी दिलेल्या माहितीनुसार, नीरजला अटक करण्यात आली आहे. तर दुसरा आरोपी अंकुश याचा शोध घेण्यासाठी पोलीस पथके शोधत आहेत. हल्ल्यात वापरण्यात आलेले शस्त्र कुठून आणण्यात आले आणि मित्रांमधील वादाचे नेमके कारण काय होते, याचा तपास सुरू आहे. पोलिसांकडून घटनास्थळी उपस्थित असलेल्या लोकांची चौकशी केली जात आहे. काही तास आधीपर्यंत मित्र वाढदिवस साजरा करत होते. केक कापणे आणि एकमेकांच्या चेहऱ्यावर केक लावण्याचे हसरे क्षण होते. मात्र त्यानंतर झालेल्या वादाने या पार्टीचे रूपांतर रक्तरंजित घटनेत झाले. सध्या एक आरोपी पोलिसांच्या ताब्यात असून दुसऱ्या आरोपीचा शोध सुरू आहे.