Nitin Gadkari: Nagpur मधील सर्व Petrol पंप बंद व्हावे ही माझी मनापासून इच्छा: गडकरी

योगेश पांडे, नागपूर

‘नागपूर शहरातून पेट्रोल आणि डिझेलचे सर्व पंप बंद व्हावे अशी माझी मनापासून इच्छा आहे.’ असं मत केंद्रीय मंत्री नितिन गडकरी यांनी व्यक्त केलं आहे. सर्व नागपूरकरांनी सीएनजी (CNG) आणि एलएनजीचा (LNG) वापर करावा. असंही गडकरी यावेळी म्हणाले.

एका कार्यक्रमात बोलताना गडकरी असं म्हणाले की, ‘नागपूर शहरातून पेट्रोल आणि डिझेलचे सर्व पंप बंद व्हावे अशी माझी मनापासून इच्छा आहे. त्यांच्या मंत्रालयाने त्यासाठी एक पॉलिसी आणली आहे. तसेच सीएनजी पंप नागपुरात लागल्यामुळे मारुती कंपनीच्या 1000 गाड्यांचे बुकिंग झाले.’

गडकरी पुढे असंही म्हणाले की, ‘येत्या सहा महिन्यात 100 टक्के शंभर टक्के इथेनॉलवर चालणाऱ्या गाड्या आम्ही आणतो आहोत. पेट्रोल 110 रुपये आणि इथेनॉल 65 रुपये आहे. त्यामुळे लोकांच्या पैशाची बचत होणार आहे.’

नागपूर महानगरपालिकेच्या लघु सांडपाणी पुनर्वापर प्रकल्पाचे लोकार्पण करण्यासाठी आयोजित करण्यात आलेल्या कार्यक्रमात नितीन गडकरी बोलत होते. यावेळी महाराष्ट्राचे विधानसभेचे विरोधी पक्षनेता देवेंद्र फडणवीस हे देखील उपस्थित होते.

‘पेट्रोल-डिझेलच्या किंमतींमुळे लोक अस्वस्थ आहेत’

दरम्यान, काही दिवसांपूर्वीच नितीन गडकरी यांनी एका जाहीर कार्यक्रमात म्हटलं होतं की, पेट्रोल आणि डिझेलच्या वाढत्या किंमतींमुळे लोकं अस्वस्थ आहेत.

नागपूरमध्ये एलएनजी फिलिंग स्टेशनचे उद्घाटन करताना नितीन गडकरी म्हणाले होते की, ‘एलएनजी, सीएनजी आणि इथेनॉल (Ethanol) सारख्या पर्यायी इंधनांच्या वापरामुळे पेट्रोलच्या दरवाढीपासून दिलासा मिळू शकेल. पेट्रोल आणि डिझेलच्या वाढत्या किंमतींबाबतही लोकांमध्ये संताप वाढला आहे. ज्यामुळे लोक अस्वस्थ आहेत आणि आंदोलन करीत आहेत.’

Flexi Fuel वाहनांबाबत बाबत नितीन गडकरींचं महत्त्वाचं वक्तव्य, म्हणाले..

गडकरीचं हे वक्तव्य हे एकप्रकारे मोदी सरकारला घरचा आहेरच होता. कारण गेल्या अनेक दिवसांपासून पेट्रोलचे दर हे सातत्याने वाढत आहेत. मात्र, याबाबत सरकारकडून कोणताही ठोस निर्णय घेतला जात नसल्याचं दिसून येत आहे.

‘परदेशातून पेट्रोल आणि डिझेल खरेदी करून देशावरील ओझे वाढत आहे. आम्ही बाहेरून आठ लाख कोटी रुपयांचे पेट्रोल व डिझेल खरेदी करत आहोत. यामुळे आपल्या अर्थव्यवस्थेवर मोठा भार पडत आहे.’ असंही गडकरी यावेळी म्हणाले होते. त्याचबरोबर ते असंही म्हणाले होते की, ‘आपली आयात कमी व्हावी आणि निर्यातीत वाढ व्हावी अशी माझी इच्छा आहे.’