शरद पवार UPA चे अध्यक्ष होणार? राष्ट्रवादीच्या कार्यकारिणीत प्रस्ताव मंजूर

पाच राज्यांच्या विधानसभा निवडणुकीचे निकाल १० मार्चला लागले. त्यानंतर देशात पुन्हा भाजपचीच लाट आहे हे दिसून आलं. कारण पंजाब वगळता इतर चारही राज्यांमध्ये भाजपने मैदान मारलं आहे. त्यानंतर आता तयारी सुरू झाली आहे ती २०२४ च्या निवडणुकांची. अशात शरद पवार यांना युपीएचं अध्यक्ष करण्यात यावं असा प्रस्ताव दिल्लीत झालेल्या राष्ट्रवादी युवक काँग्रेसच्या कार्यकारिणीत एकमताने संमत करण्यात आला आहे. त्यामुळे आता शरद पवार हे युपीएचं अध्यक्षपद सांभाळणार अशा चर्चांना राजकीय वर्तुळात उधाण आलं आहे.

बाप-लेकीचं अतूट नातं! लतादीदींच्या अंत्यसंस्कारांच्या वेळचा शरद पवार सुप्रिया सुळेंचा फोटो व्हायरल

२०१४ मध्ये राहुल गांधी हे काँग्रेसचे अध्यक्ष होते. त्यांच्या नेतृत्वात लोकसभा निवडणुका लढण्यात आल्या. मात्र काँग्रेसचा लोकसभा निवडणुकीत दारूण पराभव झाला. त्यानंतर २०१९ च्या निवडणुकीतही काँग्रेसचा पराभव झाला. नुकत्याच पार पडलेल्या पाच राज्यांच्या विधानसभा निवडणुकीतही काँग्रेसला पराभावाची धूळ चारण्यात भाजपला यश आलं. यानंतर काँग्रेस कार्यकारिणीची जी बैठक झाली त्या बैठकीत पुन्हा एकदा सोनिया गांधी, राहुल गांधी आणि प्रियंका गांधी या तिघांनीही राजीनामा देऊन नवा अध्यक्ष नेमला जावा असा प्रस्ताव मांडला. राहुल गांधी यांनी २०१९ च्या लोकसभा निवडणुकीनंतरच काँग्रेसच्या अध्यक्षपदाचा राजीनामा दिला आहे. युपीएच्या अध्यक्षा म्हणून सोनिया गांधी काम पाहात आहेत. आता मात्र राष्ट्रवादी युवक काँग्रेसच्या कार्यकारिणीत शरद पवार यांच्याकडे युपीएचं अध्यक्षपद दिलं जावं हा प्रस्ताव एकमताने मंजूर करण्यात आला. दिल्लीत झालेल्या बैठकीत शरद पवारही उपस्थित होते. या प्रस्तावामुळे आता नेमकं राष्ट्रीय राजकारणात काय होणार? हा प्रश्नही विचारला जाऊ लागला आहे.

शरद पवार हे मूळचे काँग्रेसचेच. १९९९ ला काँग्रेसच्या अध्यक्षा सोनिया गांधी या विदेशी असल्याचा मुद्दा त्यांनी काँग्रेस कार्यकारिणीच्या बैठकीत समोर आणला होता. त्यानंतर शरद पवार, तारिक अन्वर आणि पी. ए. संगमा यांची काँग्रेसमधून हकालपट्टी करण्यात आली. राष्ट्रीय स्तरावर आपण मोठा पक्ष म्हणून तयार होऊ शकतो असा विश्वास शरद पवार यांना वाटत होता. त्यामुळे त्यांनी राष्ट्रवादी काँग्रेस हा नवा पक्ष १९९९ मध्ये स्थापन केला. मात्र त्यांचा हा पक्ष महाराष्ट्रापुरताच मर्यादित राहिला. त्यानंतर कालांतराने सोनिया गांधी यांच्या विदेशीपणाचा मुद्दा बाजूला ठेवून शरद पवार यांनी काँग्रेससोबत पुन्हा हातमिळवणी केली. युपीच्या दहा वर्षांच्या सत्तेत शरद पवार हे केंद्रीय कृषी मंत्रीही होते.

आता २०१४ पासून काँग्रेसला सातत्याने जे अपयश सहन करावं लागतं आहे त्यानंतर शरद पवार यांच्याकडे युपीएचं अध्यक्षपद दिलं जावं असा प्रस्ताव मंजूर करण्यात आला आहे. काँग्रेसमध्ये नेतृत्वावरून वाद सुरू आहे. G23 मधल्या काँग्रेसच्या नेत्यांनी राहुल गांधी यांच्यावरच अपयशाचं खापर फोडलं आहे अशा सगळया परिस्थितीत शरद पवार यांच्याकडे युपीएचं अध्यक्षपद दिलं जावं असा प्रस्ताव मंजूर करण्यात आलं आहे त्यामुळे आता यावरूनही नवा वाद निर्माण होण्याची चिन्हं आहेत.

शरद पवार यांच्याकडून अमोल कोल्हेंचं समर्थन, औरंगजेब-रावणाचा दाखला देत म्हणाले….

काँग्रेस नेतृत्व करू शकत नाही असं राष्ट्रवादी युवक काँग्रेसचं म्हणणं आहे. एवढंच नाही तर शरद पवार हेच देशातील सर्व विरोधकांना एकत्र आणू शकतात. भाजपला रोखायचं असेल तर युपीएचं अध्यक्षपद शरद पवारांकडे दिलं गेलं पाहिजे असंही मंजूर केलेल्या प्रस्तावात राष्ट्रवादी युवक काँग्रेसने म्हटलं आहे.

आणखी काय म्हटलं आहे प्रस्तावात?

‘देशातली सध्याची राजकीय परिस्थिती लक्षात घेतली तर शरद पवार यांनी काँग्रेस आणि इतर प्रादेशिक पक्षांचं म्हणजेच संयुक्त पुरोगामी आघाडीचं (UPA) नेतृत्व करायला हवं. शरद पवार हे राष्ट्रीय राजकारणातले अत्यंत अनुभवी नेते आहेत. संरक्षण मंत्री आणि कृषी मंत्री म्हणूनही त्यांनी काम पाहिलं आहे. विरोधी पक्ष बळकट आणि सक्षम करायचा असेल तर शरद पवारांकडे अध्यक्षपदाची सूत्रं दिली पाहिजेत’ असं स्पष्ट करण्यात आलं आहे.

या ठरावानंतर आता लक्ष लागलं आहे ते काँग्रेसच्या आणि युपीएचे घटकपक्ष असलेल्या इतर पक्षांच्या भूमिकेकडे. या पक्षांची भूमिकाच हे स्पष्ट करू शकणार आहे की शरद पवार युपीएचे अध्यक्ष होणार की नाही..