Shiv sena : पक्ष गमावला, आता उद्धव ठाकरेंच्या हातात काय राहणार?

Shiv sena |Bow and Arrow Symbol :

मुंबई : मुख्यमंत्री एकनाथ शिंदे (Eknath shinde) यांच्या गटाला ‘शिवसेना’ (Shiv sena) म्हणून निवडणूक आयोगाने (Election Commission) मान्यता दिली आहे. त्यामुळे ‘शिवसेना’ हे पक्षाचे नाव आणि ‘धनुष्यबाण’ हे चिन्ह या गोष्टी आता शिंदे गटाला मिळाल्या आहेत. उद्धव ठाकरेंच्या (Uddhav Thackeray) गटाला हा मोठा धक्का मानला जात आहे. अशात आता पक्ष आणि नाव गमाविल्यानंतर पक्षाच्या शाखा, पक्षाचा निधी, पक्षाचे प्रमुख कार्यालय असलेले शिवसेना भवन, पक्षाचे मुखपत्र ‘सामना’ वृत्तपत्र यांचे काय होणार? असाही सवाल विचारला जात आहे. (Shiv sena : After losing the party, what will be left in Uddhav Thackeray’s hands?)

‘शिवसेना भवन’ हे यापूर्वी शिवसेना पक्षाचे मध्यवर्ती कार्यालय होते. मात्र हे शिवसेना भवन आता पक्षाच्या मालकीचे नसून शिवाई ट्रस्टच्या मालकीची मालमत्ता असल्याचं समोर आलं आहे. या ट्रस्टचे अध्यक्ष ठाकरेंचे विश्वासू नेते लीलाधर डाके आहेत. महाराष्ट्र नवनिर्माण सेनेचे (मनसे) नेते संदिप देशपांडे यांनी ट्विट केलेल्या मुंबई शहराच्या सर्व्हे रजिस्टरच्या दस्तऐवजानुसार, या ट्रस्टवर दिवाकर रावते, खासदार सुभाष देसाई, अरविंद सावंत आणि मुंबईच्या माजी महापौर विशाखा राऊत यांचाही समावेश आहे. यातील कोणीही शिंदेसोबत गेलेलं नाही.

Maharashtra Political Crisis: बंडखोरी ते सेनेचा ताबा, शिंदेंनी कशी केली मात?

त्यामुळे शिवसेना पक्ष जरी एकनाथ शिंदे यांच्या ताब्यात गेला असला तरी दादरचे सेना भवन मात्र ठाकरे यांच्या ताब्यात राहणार असल्याचं सांगितले जात आहे. याचदरम्यान, शिवसेना भवनाच्या विरोधात धर्मादाय आयुक्तांकडे सामाजिक कार्यकर्ते आणि वकील योगेश देशपांडे यांनी तक्रार दिली आहे. एखाद्या ट्रस्टची जागा शिवसेना भवनाला कशी दिली? सार्वजनिक ट्रस्टच्या मालमत्तेचा राजकीय कार्यालय म्हणून कसा वापर केला जाऊ शकतो? असे सवाल योगेश देशपांडे यांनी उपस्थित केले आहेत.

सामनाचे आणि मार्मिकचे काय होणार?

शिवसैनिकांसह अनेकांना सामना वृत्तपत्राचे आणि मार्मिक साप्ताहिकाचे काय होणार? असा प्रश्न पडला आहे. मात्र ही दोन्ही प्रकाशने ‘प्रबोधन प्रकाशन’ या संस्थेच्या मालकीची आहेत. ही एक पब्लिक लिमिटेड कंपनी आहे. याची मालकी रश्मी ठाकरे यांच्याकडे आहे. त्यामुळे ‘सामना’ आणि मार्मिकचा ताबा ठाकरे यांच्याकडेच असणार आहे.

Shiv Sena: शिंदेंच्या व्हिपमुळे ठाकरेंच्या आमदारांचं सदस्यत्व धोक्यात?

शाखांचे काय होणार?

मुंबई शहरामध्ये शिवसेनेच्या प्रत्येक प्रभागात एक किंवा त्यापेक्षा अधिक शाखा आहेत. याशिवाय राज्याच्या इतर शहरी आणि ग्रामीण भागांमध्ये शिवसेनेच्या मोठ्या प्रमाणावर शाखा आहेत. परंतु यातील बहुतांश शाखा अनधिकृत आहे. त्या स्थानिक शिवसैनिकांकडूनच चालवल्या जातात. तर अनेक शाखा (शाखा) शिवाई ट्रस्टकडे हस्तांतरित होण्याच्या प्रक्रियेत आहेत, अशी माहिती शिवसेना भवनच्या पदाधिकाऱ्याने दिली.

याशिवाय मुंबईबाहेरील अनेक शाखा एकतर आमच्या शाखाप्रमुखांच्या मालकीच्या आहेत किंवा ग्रामीण भागातील स्थानिक मंडळे, ट्रस्ट आणि तालमींकडून चालविल्या जातात. त्यामुळे इतर कोणत्याही राजकीय घटकांवर दावा करता येणार नाही, असे राज्यसभा खासदार अनिल देसाई आणि यांनी स्पष्ट केलं.

दरम्यान, मुख्यमंत्री एकनाथ शिंदे यांनी उद्धव ठाकरेंच्या कोणत्याही मालमत्तेवर दावा करणार नसल्याचे स्पष्ट केले आहे. मालमत्तांच्या मोहात पडलेल्यांनी २०१९ मध्ये चुकीचे पाऊल उचलून मतदारांची फसवणूक केली होती. मात्र, आम्हाला पक्षाची मालमत्ता आणि निधीचा मोह नाही. बाळासाहेब ठाकरे यांची विचारधारा आम्हाला पुढे न्यायची आहे. त्यामुळे आम्ही उद्धव सेनेपासून फारकत घेण्याचं पाऊल उचललं, असे शिंदे यांनी स्पष्ट केलं.