Sanjay Raut-Raj Thackery: संजय राऊतांनी ‘शिवतीर्था’वर जाऊन घेतली राज ठाकरेंची भेट, राजकीय वर्तुळात तुफान चर्चा

मुंबई: शिवसेनेचे फायरब्रँड नेते आणि खासदार संजय राऊत (Sanjay Raut) यांनी बुधवारी (17 नोव्हेंबर) सकाळी मनसे अध्यक्ष राज ठाकरे (Raj Thackeray) यांच्या मुंबईतील ‘शिवतीर्थ’ निवासस्थानी जाऊन त्यांची भेट घेतली असल्याचं वृत्त समोर येत आहे. संजय राऊत यांनी राज ठाकरे यांची अचानक भेट घेतल्याने वेगवेगळ्या चर्चा सुरु झाल्या आहेत. मात्र मिळालेल्या माहितीनुसार, संजय राऊत हे आपल्या मुलीच्या लग्नाची पत्रिका देण्यासाठी राज ठाकरे यांच्या घरी सपत्नीक गेले होते. यावेळी त्यांनी राज ठाकरे आणि त्यांच्या कुटुंबीयांना लग्नासाठी आमंत्रित केलं आहे.

शिवसेनाप्रमुख बाळासाहेब ठाकरे यांचा स्मृतीदिन असल्याने संजय राऊत हे श्रद्धांजली वाहण्यासाठी शिवाजी पार्कवर बाळासाहेबांच्या समाधीस्थळी आले होते. यानंतर संजय राऊत यांनी थेट राज ठाकरेंच्या ‘शिवतीर्थ’ या राज ठाकरेंच्या नव्या घराकडे आपला मोर्चा वळवला. यावेळी संजय राऊत यांच्या पत्नी वर्षा राऊत या देखील सोबत होत्या.

मिळालेल्या माहितीनुसार, 29 नोव्हेंबर रोजी संजय राऊत यांची कन्या पूर्वशी हिचं 29 नोव्हेंबर रोजी लग्न आहे. याच लग्नाची पत्रिका देण्यासाठी संजय राऊत हे राज ठाकरेंच्या घरी गेले होते. यावेळी बराच वेळ राज ठाकरे आणि संजय राऊत यांच्या गप्पा झाल्या. दरम्यान, ही भेट राजकीय नसून कौटुंबिक असल्याचं संजय राऊत यांच्याकडून सांगण्यात येत आहे. मात्र, असं असलं तरीही या भेटीमुळे राजकीय वर्तुळात वेगवेगळे अंदाज वर्तवले जात आहेत.

संजय राऊतांना सोडण्यासाठी राज ठाकरे स्वत: आले दारापर्यंत!

दरम्यान, संजय राऊत हे जेव्हा निमंत्रण देऊन परतत होते तेव्हा राज ठाकरे हे स्वत: राऊत दाम्पत्याला सोडण्यासाठी त्यांच्या गाडीपर्यंत आले होते. त्यांच्यासोबतच शालिनी ठाकरे आणि अमित ठाकरे हे देखील त्यांना सोडण्यासाठी दारापर्यंत आले होते. यावेळी ‘शिवतीर्थ’च्या गेटबाहेर देखील हे दोन्ही काही वेळ बोलत असल्याचं पाहायला मिळालं.

शरद पवार, भगतसिंह कोश्यारींनाही लग्नाचं निमंत्रण

काही दिवसांपूर्वीच संजय राऊत यांनी राष्ट्रवादी काँग्रेसचे सर्वेसर्वा शरद पवार यांच्या घरी जाऊन त्यांनाही मुलीच्या लग्नाची पत्रिका दिली होती. तसंच राजभवनावर जाऊन राज्यपाल भगतसिंह कोश्यारी यांनाही पत्रिका देऊन लग्नासाठी निमंत्रण दिलं होतं. दरम्यान, राऊतांच्या या राजकीय गाठभेटीमुळे राजकीय वर्तुळात मात्र वेगवेगळ्या चर्चांना उधाण आलं होतं.

Shivsena MP संजय राऊत यांनी घेतली राहुल गांधींची भेट, म्हणाले…

29 नोव्हेंबरला लग्नसोहळा

संजय राऊत यांच्या कन्या पूर्वशी हिचा लग्नसोहळा 29 नोव्हेंबरला संपन्न होणार आहे. ठाण्याचे जिल्हाधिकारी राजेश नार्वेकर यांचे पुत्र मल्हार नार्वेकर याच्याशी पूर्वशीचं लग्न होणार आहे. पूर्वशी ही उच्चशिक्षित असून ती सिनेसृष्टीत निर्माती म्हणूनही काम करते. ‘ठाकरे’ या सिनेमाची तीच निर्माती आहे. तर तिचा होणारा पती मल्हार हा आयटी इंजिनिअर असून त्याचा स्वत:चा व्यवसाय आहे.