किरीट सोमय्यांविरुद्ध शिवसैनिकांची पिंपरी-चिंचवडमध्ये घोषणाबाजी, दाखवले काळे झेंडे

गेल्या काही दिवसांपासून महाविकास आघाडी सरकारमधील नेत्यांची कथित भ्रष्टाचाराची प्रकरण बाहेर काढणाऱ्या किरीट सोमय्यांमुळे राजकीय वातावरण चांगलंच तापलं आहे. आज पिंपरी-चिंचवड दौऱ्यावर असलेल्या किरीट सोमय्यांना शिवसैनिकांच्या रोषाचा सामना करावा लागला.

पिंपरी-चिंचवड महापालिकेत सत्ता असलेल्या भाजप नेत्यांनी केलेल्या भ्रष्टाचाराची चौकशी करावी असं निवेदन किरीट सोमय्या यांना शिवसेनेच्या पदाधिकाऱ्यांनी देण्याचा प्रयत्न केला. यासाठी शिवसैनिकांनी किरीट सोमय्यांची गाडीही रोखून धरली, परंतू सोमय्यांनी शिवसैनिकांकडे दुर्लक्ष करत पुढे जाण्याचं ठरवलं. यानंतर शिवसेना आणि भाजप कार्यकर्त्यांमध्ये जोरदार घोषणाबाजी झाली.

यानंतर भाजप कार्यालयात घेतलेल्या पत्रकार परिषदेत किरीट सोमय्यांनी पवार-ठाकरे कुटुंबावर पुन्हा एकदा आरोप केले.

शिवसेना नेते अर्जुन खोतकर यांचा जालना सहकारी साखर कारखान्याशी थेट संबंध असल्याची टिका करतानाच ज्या पद्धतीने जरंडेश्वर कारखाना खरेदी केला गेला त्याच पद्धतीने जालना कारखाना खरेदी केल्याचा आरोप करत सोमय्या यांनी केला. यावेळी सोमय्यांनी अर्जुन खोतकरांच्या चौकशीची मागणीही केली.

तसेच याच कारखान्यामध्ये अजित सीड्स प्रायव्हेट लिमिटेड कंपनीचा हिस्सा आहे आणि या कम्पनीचे समभाग विश्वास नांगरे पाटील यांच्या पत्नी रुपाली नांगरे पाटील आणि सासऱ्यांकडे असल्याचा आरोप करतानाच चौकशी पूर्ण होत नाही तोपर्यंत विश्वास नांगरे पाटील यांना पोलिस सेवेतून मुक्त करावे आणि जालना कारखाना प्रकरणी सीबीआय किंवा उच्च नाययल्याच्या न्यायाधीशनच्या अध्यक्षतेखाली चौकशी करावी अशी मागणी सोमय्या यांनी केली.

पत्रकार परिषद संपल्यानंतरही शिवसेना विरुद्ध भाजप सामना पहायला मिळाला. भाजप कार्यालयाबाहेर शिवसेना नेत्यांनी किरीट सोमय्यांच्या गाडीला काळे झेडें दाखवत जोरदार घोषणाबाजी केली. याला प्रत्युत्तर म्हणून भाजपनेही जोरदार घोषणाबाजी केली. अखेरीस पोलिसांनी शिवसैनिकांना बाजूला काढत किरीट सोमय्यांच्या गाडीला जाऊ दिलं.